स्क्र्याबलको अन्तर्राष्ट्रिय मञ्चमा नेपालको प्रतिनिधित्व गर्दै अनिमेष लामिछाने

पोखरा ।

न्याश्नल इन्भेन्टिभ माध्यमिक विद्यालयका छात्र अनिमेष लामिछाने ले अन्तर्राष्ट्रिय स्तरको स्क्र्याबल प्रतियोगितामा नेपालको प्रतिनिधित्व गर्ने भएका छन् ।

अनिमेष यही जेठ १५ देखि १८ गतेसम्म थाइल्याण्डको बैंककमा आयोजना हुने “वेस्पा अन्तर्राष्ट्रिय स्क्र्याबल प्रतियोगिता–२०२६” मा नेपालको तर्फबाट सहभागी हुन लागेका हुन् ।

विद्यालय परिवारले एक कार्यक्रमका बीच उनलाई नगद सम्मानसहित सफलताको शुभकामना व्यक्त गरेको छ । विद्यालयले अन्तर्राष्ट्रिय मञ्चमा अनिमेषले उत्कृष्ट प्रदर्शन गर्दै विद्यालय तथा नेपालको नाम उच्च राख्ने विश्वास व्यक्त गरेको छ ।

शिक्षक तथा विद्यार्थीहरूले उनको यो उपलब्धिलाई विद्यालयकै लागि गौरवको विषय भएको बताएका छन् । अन्तर्राष्ट्रिय प्रतियोगितामा सहभागिताले नेपाली विद्यार्थीको प्रतिभा विश्वसामु चिनाउने अवसर मिल्ने उनीहरूको धारणा छ ।

प्रतियोगितामा सहभागिताका लागि तयारीमा रहेका अनिमेषलाई विद्यालय परिवार, अभिभावक तथा शुभेच्छुकहरूले सफलताको शुभकामना व्यक्त गरेका छन् ।