नचिनेको समूहद्वारा पाँच पसलमा आगजनी, लाखौँको क्षति

महोत्तरी । महोत्तरीमा एकैसाथ पाँचवटा पसलमा आगजनी भएको छ।

जिल्लाको एकडारा गाउँपालिका–३ भटौलिया बजारमा गएराति नचिनेको समूहले एकैसाथ पाँचवटा पसलमा आगजनी गरेको प्रहरीले जनाएको छ।

जिल्ला प्रहरी कार्यालय महोत्तरीकाअनुसार भटौलिया बजारमा स्थानीय रामएकवालको चिया पसल, राजकुमारी साहको खाजा पसल, योगेन्द्र शाहको चिया पसल, शम्भु शाहको खाजा पसल र मङ्गल शाहको चिया पसलमा नचिनेको समूहले गएराति करिब ९ बजेको समयमा आगजनी गरेका छन् ।

आगजनीबाट पाँचवटै पसलभित्र रहेका विभिन्न खाद्यान्न, कुर्सी, बेञ्च, टेबुल, फ्रिज, भाँडाकुँडा, ग्याँस सिलिण्डर, चुल्हो र घरसमेत जलेर पाँच लाख रुपैयाँभन्दा बढीको क्षति भएको पसलेहरूले बताएका छन्। पसलमा राति कोही नभएको अवस्थामा आगजनी गरिएको थियो ।