पोखरा ।
शिक्षा, विज्ञान तथा खेलकुदमन्त्री सस्मित पोखरेलले उच्च शिक्षामा राजनीतिक हस्तक्षेप अन्त्य गरी योग्यता प्रणालीमा आधारित नियुक्ति प्रक्रिया लागू गरिएको बताएका छन् ।
शुक्रबार राष्ट्रिय सभाको बैठकमा सांसदहरूले उठाएका प्रश्नको जवाफ दिँदै मन्त्री पोखरेलले विश्वविद्यालय तथा अन्य शैक्षिक संस्थामा भएका राजनीतिक नियुक्ति खारेज गरी खुला प्रतिष्पर्धामार्फत पदपूर्ति गरिएको जानकारी दिएका हुन् ।
उनकाअनुसार हाल नौ वटा विश्वविद्यालयमा उपकुलपति नियुक्त भइसकेका छन् भने बाँकी विश्वविद्यालयहरुमा नियुक्ति प्रक्रिया अगाडि बढेको बताए ।
उनले त्रिभुवन विश्वविद्यालय सेवा आयोगका अध्यक्ष, सदस्यसहित अन्य उच्च पदस्थ पदाधिकारीको नियुक्ति सम्पन्न भइसकेको तथा बाँकी रिक्त पदहरूको पदपूर्ति प्रक्रिया अन्तिम चरणमा पुगेको जानकारी दिए ।
मन्त्री पोखरेलले नेपालमा पहिलो पटक सबै विश्वविद्यालयमा राजनीतिक हस्तक्षेपविना विज्ञ टोलीमार्फत खुला प्रतिस्पर्धाका आधारमा उपकुलपति नियुक्त गरिएको दाबी गरे ।
उनले विश्वविद्यालयमा सुशासन कायम गर्न, शैक्षिक वातावरण सुधार गर्न तथा वार्षिक शैक्षिक क्यालेण्डर तयार गरी कार्यान्वयन गर्न निर्देशन दिइएको उल्लेख गर्दै हाल सबै विश्वविद्यालयले वार्षिक क्यालेण्डर तयार गरिसकेको जानकारी दिए ।
उनले भने, ‘उच्च शिक्षालाई दलगत राजनीतिबाट मुक्त गरी योग्यता प्रणालीमा आधारित शिक्षाको सुनिश्चितताका लागि विश्वविद्यालय लगायत शैक्षिक संस्थामा भएको मनोनयन खारेज गरिएको हो । हाल ९ वटा विश्वविद्यालयहरुमा उपकुलपति नियुक्त भइसकेका छन् । त्रिवि सेवा आयोगको अध्यक्ष, सदस्य लगायत अन्य उच्च पदस्थ पदाधिकारीहरुको नियुक्ति पनि भइसकेको छ । र अन्य रिक्त रहेका केही संस्थाहरुमा पदपुर्तिको प्रक्रिया अन्तिम चरणमा पुगेको छ । सम्भवतः नेपालमा पहिलो पटक सम्पूर्ण विश्वविद्यालयहरुमा खुला प्रतिस्पर्धामार्फत कुनैपनि राजनीतिक हस्तक्षेप नभईकन विज्ञ टोली गठन गरेर उपकुलपतिहरुको नियुक्ति गरेका छौँ । साथै सुशासन कायम गर्न, शैक्षिक वातावरणमा सुधार गरी सम्पूर्ण विश्वविद्यालयहरुलाई वार्शिक क्यालेण्डर निर्माण गरी कार्यान्वयन गर्न पनि निर्देशन दिइएको छ । र हालसम्म सबै विश्वविद्यालयहरुले क्यालेण्डर निर्माण गरिसकेको अवस्था छ ।’
उनले अन्य विश्वविद्यालयहरुको ऐनमा रहेको व्यवस्थाका कारण उपकुलपति नियुक्तिमा ढिलाई भइरहेको बताए । उनले कक्षा १२ को नतिजा प्रकाशनको क्रममा कुनैपनि लापरवाही नभएको समेत दाबी गरे ।
प्रकाशित मिति २०८३ साउन १५ गते शुक्रबार ०५:०७
