एजेन्सी ।
म्यानमारमा जुलाईको मध्यदेखि शुरु भएको बाढीका कारण हालसम्म नौवटा क्षेत्र र राज्यका ३२ वटा टाउनसिप (नगरपालिका) प्रभावित भएका छन् ।
म्यानमार रेडियो र टेलिभिजनले विपद् व्यवस्थापन विभागलाई उद्धृत गर्दै यसबारे जानकारी दिएको हो । बाढीबाट विशेषगरी कचिन राज्य, कायिन राज्य, सागाइङ क्षेत्र, बागो क्षेत्र, मगवे क्षेत्र, मण्डले क्षेत्र, मोन राज्य, सान राज्य र इरावदी क्षेत्र बढी प्रभावित भएका छन् । विपद् व्यवस्थापन विभागका अनुसार बाढीका कारण ६० हजारभन्दा बढी मानिस प्रभावित भएका छन् । विस्थापित नागरिकहरूलाई सुरक्षित राख्न प्रभावित ३२ वटा टाउनसिपहरूमा १२६ वटा राहत शिविर तथा आश्रयस्थलहरू सञ्चालनमा ल्याइएको छ । गत जुलाईको मध्यदेखि परेको भारी वर्षासँगै नदी तथा खोलाहरूमा जलस्तर बढेर तटबन्धहरू नाघेपछि बाढीको प्रकोप शुरु भएको थियो । शुरुवाती चरणमा मोन राज्य र बागो क्षेत्रमा बाढीले क्षति पु¥याएको थियो भने पछि अन्य राज्य र क्षेत्रहरूमा पनि प्रकोप फैलिएको हो । इरावदी क्षेत्रमा भने तटबन्ध फुट्दा ठूलो भूभाग जलमग्न भएको समाचारमा उल्लेख छ ।
राहत तथा उद्धार कार्यका सम्बन्धमा प्राप्त जानकारी अनुसार, गत बुधबारसम्म बाढी प्रभावितहरूका लागि १७ करोड क्याट (करिव ८० हजार ९५२ अमेरिकी डलर) बराबरको सहयोग उपलब्ध गराइएको छ । सरकारले प्रभावित क्षेत्रहरूमा राहत वितरण कार्यलाई अझै निरन्तरता दिइरहेको बताइएको छ ।
प्रकाशित मिति २०८३ भदौ १ गते सोमबार १२:००
