पोखरा महानगरले मापदण्डविपरीतका संरचना बनाउने कार्यमा संलग्न नहुन निर्माण व्यवसायीलाई आग्रह गरेको छ । महानगरले आइतबार निर्माण व्यवसायीका नाममा एक सूचना जारी गर्दै मापदण्डविपरीतका संरचना निर्माणमा सहभागी नहुन अनुरोध गरेको हो ।
महानगरले पोखरा क्षेत्रभित्रका हरेक ठाउँमा संरचना बनाउनुअघि उनीहरुले संरचना वैध हो वा होइन यकीन गर्नुपर्ने जनाएको छ । उक्त कार्यमा संलग्न भएको पाइए कारवाहीको भागिदार हुने चेतावनी दिएको छ ।
‘अनधिकृत रुपमा मापदण्डविपरीतका संरचना निर्माणमा सहभागी भएका र त्यस कार्यमा प्रयोग भएका सवारी साधनलगायत कानुनबमोजिम नियन्त्रणमा लिइनेछ,’ सूचनामा भनिएको छ ।
शनिबारसमेत पाेखरा फेवाताल किनारमा बनिरहेका ३ वटा अवैध संरचनाका निर्माण सामग्री जफत गरेकाे थियाे ।
प्रकाशित मिति २०७९ असोज २ गते आइतबार ०४:५३
