गोरखा ।
गोरखाको सहिद लखन गाउँपालिका–दार्सिङ स्थित श्री गङ्गाधर्म आधारभूत विद्यालयको भवनमा निःशुल्क स्वास्थ्यशिविर सम्पन्न भएको छ ।
शनिबार गुन्जमान सिंह अस्पताल, छिमेकी लघुबित्त बित्तीय संस्था लिमिटेड र सहिद लखन गाउँपालिका–३को संयुक्त आयोजनामा निःशुल्क स्वास्थ्य शिविर सम्पन्न भएको हो ।
भरतपुरबाट आएका १० बढी वरिष्ठ चिकित्सकको उपस्थितीमा निःशुल्क स्वास्थ्य शिविर सम्पन्न भएको वडा नं ३ का वडाध्यक्ष दिपक पाण्डेले जानकारी दिए । सो क्रममा ६ वटा सेवा सञ्चालन गरिएको साथै औषधि निशुल्क वितरण गरिएको थियो । स्वास्थ्य शिविरमा ४५० भन्दा बढीले निशुल्क सेवा लिएको उनले बताए ।
स्वास्थ्य शिविरमा २०० जना भन्दा बढीको भिडियो एक्सरे गरिएको थियो । साथै आज उपचारबाट बञ्चित भएकाका लागि गुन्जमान सिंह अस्पतालमा विशेष सहुलियतका साथ स्वास्थ्य परीक्षण र उपचार गरिने उनले उल्लेख गरे ।
ग्रामीण भेगका मानिसहरु आर्थिक अभाव र विभिन्न कारणबाट उपचारबाट बञ्चित हुनबाट रोक्न आफूहरुले उक्त शिविर सञ्चालन गरेको छिमेकी लघुबित्त बित्तीय संस्था लिमिटेडका प्रमुख कार्यकारी अधिकृत दिपक निधि तिवारीले जानकारी दिए ।
‘ग्रामीण भेगका जनताको लुकेर बसेको रोग पहिचान गरि समयमै उपचार गर्न यसले सहयोग पुग्ने विश्वास लिएका छौँ । साथै आगामी दिन पनि यस्तै शिविर सञ्चालन गरेर ग्रामीण भेगका जनतालाई सहयोग गर्न लागिपर्नेछौँ ।’ उनले भने ।
