नेपालमा काेराेना फेरि भयावह : मंगलबार मात्रै झण्डै ५ हजार संक्रमित थपिए

पाेखरा । नेपालमा काेराेना संक्रमणकाे दर फेरि भयावह अवस्थामा पुगेकाे छ । मंगलबार एकैदिन देशभर ४ हजार ९०४ जना कोरोना संक्रमित थपिएका छन् । संक्रमित हुनेकाे संख्या बढेसँगै नेपालमा काेराेनाका कारण ज्यान गुमाउनेहरूकाे संख्या समेत बढेकाे छ ।

स्वास्थ्य तथा जनसंख्या मन्त्रालयका अनुसार पछिल्लो २४ घण्टामा १३ हजार २१७ नमूना पिसिआर परीक्षण गर्दा ३ हजार १९४ मा संक्रमण देखिएको छ भने एन्टिजेन विधिबाट ५ हजार ९०६ मा परीक्षण गर्दा १७१० मा संक्रमण देखिएको छ। कुल १९ हजार १२३ जनाको नमूना परीक्षण गर्दा सो संख्याका संक्रमित थपिएका हुन् ।

थप ३५ जनाको संक्रमणका कारण मृत्यु भएको मन्त्रालयले जनाएको छ। योसहित मृत्यु हुनेको संख्या १० हजार १५० पुगेको छ।

पछिल्लो २४ घण्टामा २ हजार ११५ जना कोरोनाबाट मुक्त भएका छन्। योसहित निको हुनेको संख्या ६ लाख ७३ हजार १ सय ९८ पुगेको छ।

हालसम्म सक्रिय संक्रमितको संख्या ३७ हजार ३ सय ३२ रहेको छ।