पोखरा ।
विनयी खोलामा बनाइएको डाइभर्सनमा बाढीले क्षति पु¥याउँदा र ठाउँ–ठाउँमा हिलो भएका कारण पूर्वपश्चिम राजमार्गअन्तर्गत नवलपरासीमा गाडी गुड्न समस्या भएको छ ।
नवलपरासीमा सडक हिलो र चिप्लो भएका कारण गाडी गुड्न समस्या भएको जिल्ला प्रहरी कार्यालय पूर्वी नवलपरासीले जनाएको छ ।
डाभइर्सनमा क्षति भएका कारण विश्वकर्मा मन्दिर, घिउखोलालगायतका ठाउँमा सडक चिप्लो भई गाडी फस्ने र चिप्लिने समस्या भएको छ ।
सडक बिग्रिएकोले जाम र दुर्घटनाको जोखिम भएकोले वैकल्पिक रुटको प्रयोग गर्न जिल्ला प्रहरी कार्यालय पूर्वी नवलपरासीले आग्रह गरेको छ ।
विनयी खोलाको डाइभर्सनमा क्षति तथा दुम्किवास–दाउन्ने सडक खण्डको विश्वकर्मा मन्दिर, घ्युखेलालगायत स्थानका सडक चिप्लो भएका कारण गाडी फसेर आवागमनमा अवरोध भएपछि प्रहरीले सर्वसाधारणसँग यस्तो आग्रह गरेको हो ।
बिहीबार बिहान विज्ञप्ति जारी गर्दै यो सडक भएर यात्रा नगर्न र वैकल्पिक मार्गको प्रयोग गर्न अनुरोध गरिएको छ ।
प्रहरीका अनुसार पूर्ववाट पश्चिम जाने ठूला सवारीसाधन नारायणघाट–मुग्लिन–पोखरा–स्याङ्जा हुँदै बुटवल निस्कन सक्नेछन् ।
यसैगरी पश्चिमबाट पूर्व जाने ठूला सवारीसाधन बुटवल–स्याङ्जा–पोखरा–मुग्लिन हुँदै गुड्न सक्नेछन् ।
साना सवारीसाधन भने बाटोको अवस्था बुझेर कालीगण्डकी करिडोरअन्तर्गत गैँडाकोट, पिपलडाँडा सडक खण्डबाट जानसक्ने प्रहरीले बताएको छ ।
मंगलबार दुम्किवासस्थित विनयी खोलाको डाईभर्सन बगाएपछि दिनहुँजसो अवरोध भइरहेको छ ।
यो डाइभर्सन सात पटकसम्म खोलाले बगाउँदा आवागमन कठिन भएको प्रहरीको भनाइ छ ।
प्रकाशित मिति २०८२ असार ५ गते बिहीबार ०९:५६
