को हुन्, विन्दुकुमार थापा ?

पाेखरा

गण्डकी प्रदेशका कानुन सञ्चार तथा प्रदेश मामिला मन्त्री विन्दुकुमार थापालाई यो पटक पनि नेपाली कांग्रेसले कास्की क्षेत्र नम्बर २ ख मा उम्मदेवार बनाएको छ ।

२०७४ सालको निर्वाचनमा वाम गठबन्धनका राजकाजी गुरुङ ‘करण’लाई पराजित गरेर कास्कीका नेपाली कांग्रेसको विरासत जोगाएका थापाको यो पटक भने नेकपा एमालेकी मीना गुरुङसँग प्रतिस्पर्धा हुनेछ । अघिल्लो निर्वाचनमा उनले १० हजार ७२६ मत पाउँदा नेकपा माओवादीका करणले ९ हजार ९२४ मत ल्याएका थिए ।

व्यापारिक पृष्ठभूमिबाट राजनीतिमा आएका थापाको राजनीतिक जीवन भने त्यति लामो छैन । उद्योगी व्यवसायीहरुको छाता संस्था पोखरा उद्योग वाणिज्य संघको पूर्व अध्यक्ष समेत रहेका थापा विभिन्न व्यवसायमा आवद्ध छन् ।

उनले कांग्रेसकै अर्का आकांक्षी तथा प्रदेश सरकारका भौतिक विकासमन्त्रीसमेत रहेका कुमार खड्कालाई पछि पार्दै प्रदेश सभाको टिकट हात पारेका हुन् । खड्का यसअघि समानुपातिकबाट प्रदेश सभा सदस्य चुनिएका थिए ।