गोरखामा एमाले उम्मेद्वारको समूहमाथि आक्रमण, एक जना गम्भीर घाइते

पोखरा ।

गोरखा २ मा नेकपा एमालेका प्रतिनिधिसभा सदस्य उम्मेदवार रहेका अब्दुस मियाँको टोलीमाथि आइतबार राति आक्रमण भएको छ ।

११ बजेतिर पाँच जनाको समूहले खाना खाने क्रममा पालुङटार नगरपालिका-७ स्थित म्याङ्गो रिसोर्टमै बियरको बोतलले आक्रमण गरेको हो ।

घटनामा एक जना गम्भीर घाइते भएका छन् । एमाले प्रदेश सचिवालय सदस्य हरि काफ्लेको टाउकोमा चोट लागेको छ । टाउकोमा सातवटा टाँका लगाएर उनलाई थप उपचारका लागि राति नै काठमाडौं पठाइएको छ ।

प्रहरीले घटनामा संलग्न दुई जनालाई नियन्त्रणमा लिएको छ । राम सापकोटा र अजित पन्त भन्ने दुई युवा पक्राउ परेका छन् । तीन जना घटनापछि भागेको बताइएको छ ।

उनीहरुलाई विपक्षी प्रतिस्पर्धीले पठाएको दाबी एमाले पक्षको छ ।