फ्रान्सका युवा खेलाडी एम्बापे गाेल्डेन बुटका दाबेदार

पाेखरा

फ्रान्सका युवा खेलाडी केलिएन एमबाप्पे कतारमा जारी फिफा विश्वकप २०२२ को सर्वाधिक गोलकर्ताको होडमा अगाडि आएसँगै गोल्डेन बुटमा आफ्नो दाबेदारी देखाएका छन् । जारी खेलमा उनले ५ गोल र २ असिस्ट गरेका छन् ।

२३ वर्षीय युवा खेलाडी एम्बापेले अन्तिम १६ अन्तर्गत आइतबार पोल्याण्डविरुद्ध दुई गोल गरेका हुन् । उनको २ गोलको सहारामा फ्रान्स पोल्यान्डलाई हराएर क्वार्टरफाइनलमा प्रवेश गरेको छ ।

एम्बापेले २ गोल गर्दा ओलिभर जिरुदले एक गोल गरेका थिए ।

समूह चरणमा अष्ट्रेलिया विरुद्ध एक गोल गरेका एमबाप्पेले डेनमार्क विरुद्ध दुई गोल गरेका थिए भने ट्युनिसिया विरुद्ध गोल गर्न सकेनन् ।

जारी विश्वकपमा एमबापेपछि धेरै गोल गर्नेमा लिओनल मेसी, अल्भारो मोराटा, मार्कुस रासफोर्ड र कोडी गाक्पो छन् । सबैले समान ३–३ गोल गरेका छन् । मेसी र मोराटाले समान एक असिस्ट पनि गरेका छन् ।

इंग्ल्याण्डका बुकाया साकाले पनि ३ गोल गरेका छन् । ३ गोल नै गरेका इक्वेडरका इनर भ्यालेन्सिया विश्वकपबाट बाहिरिसकेका छन् ।