गण्डकीमा एमालेले खगराजलाई सर्वसम्मत बनायो दलको नेता

पोखरा

नेकपा एमाले गण्डकी प्रदेश संसदीय दलको नेतामा खगराज अधिकारी सर्वसम्मत भएका छन् । आइतबार बसेको बैठकले उनलाई संसदीय दलको नेतामा सर्वसम्मत चयन गरेको हो ।

कास्की १(ख) बाट निर्वाचित एमाले पार्टी संगठन विभाग प्रमुख अधिकारीलाई एमाले संसदीय दलको नेता भएसँगै मुख्यमन्त्री बन्ने ढोका खुलेको छ । एमाले गण्डकीमा दोस्रो ठुलो शक्ति हो । केन्द्रमा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ लाई प्रधानमन्त्री बनाउन एमाले सहमत भएसँगै गण्डकीमा मुख्यमन्त्री एमालेले पाउन सक्छ ।

एमालेले गण्डकीमा प्रत्यक्षतर्फ १२ र समानुपातिकमा १० सिट जितेको छ ।