साढे ७ किलो गाँजासहित २ युवा पक्राउ

पोखरा

तनहुँको बेनिटारबाट गाँजासहित २ युवा पक्राउ परेका छन् । आँबुखैरेनी गाउँपालिका–४ बेनिटारबाट तनहुँ प्रहरीले खानतलासी गर्दा साढे ७ किलो गाँजासहित पर्वतका २ युवा पक्राउ परेका हुन् ।

पक्राउ पर्नेमा पर्वतको मोदी गाउँपालिका–८ का २९ वर्षीय दिवस गुरुङ र २४ वर्षीय विशाल सुनार रहेको जिल्ला प्रहरी कार्यालय तनहुँका सूचना अधिकारी प्रहरी नायब उपरीक्षक मोहनबहादुर खाँणले बताए । पृथ्वीराजमार्गको मुग्लिन पुलजिपबाट खटिएको प्रहरी टोलीले पक्राउ गरेको हो ।

उनीहरु गोरखाको घ्याचोकबाट मुग्लिन हुँदै ग १३ प ६३६४ नम्बरको मोटरसाइकलमा पोखरा आउँदै थिए । मोटरसाइकल चेकजाँच गर्ने क्रममा मोटरसाइकलको पछाडी सवार दिवस गुरुङको झोलामा साढे ७ किलो गाँजा फेला परेको प्रहरी नायब उपरीक्षक खाँणले जानकारी दिए । प्रहरीले जिल्ला अदालत तनहुँबाट ८ दिनको म्याद थप गरी अनुसन्धान भइरहेको जनाएको छ ।