माओवादी द्वन्द्वकालका बेला छोरा बेपत्ता पारिएको भन्दै पोखरा महानगरपालिका–३० का अणनाथ बरालले नेपाली सेनाविरुद्ध जिल्ला प्रहरी कार्यालय कास्कीमा किटानी जाहेरी दिएका छन् ।
२०६० कात्तिक १९ गते बिहान ५ बजे छोरा नेत्रप्रसादलाई पक्राउ गरी बेपत्ता पारेको भन्दै फूलबारी ब्यारेकका सुबेदार कृष्णबहादुर गुरुङबिरुद्ध बरालले सोमबार किटानी जाहेरी दिएका हुन् ।
गुरुङको कमाण्डमा गएका १४/१५ जना हतियारसहितका सेनाको टोलीले पक्राउ गरेर आजसम्म स्थिति बेपत्ता पारेको किटानी जाहेरीमा उल्लेख छ । उनले क्षतिपूर्तीकोसमेत माग गरेका छन् ।
छोरा बेपत्ता भएको करिब २ वर्षपश्चात पोखरा तालिमका क्रममा आएका तत्कालीन शाही सेनाका शुक्रराज सापकोटाले २०६२ कात्तिकसम्म छोरा गोरखाको महेन्द्र गणमा रहेको बताएको बरालले उल्लेख गरेका छन् । सँगै पक्राउ परेका अन्य ३ जनालाई सार्वजनिक गरिसक्दा पनि नेत्रप्रसादको स्थिति भने थाहा नभएको बरालले बताए ।
नेत्रप्रसादका बुवा अणनाथ र श्रीमान गुमाएकी आरती शर्माले प्रहरी र सरकारी वकिलको कार्यालयले पनि जाहेरी नलिएपछि २०७८ मंसिर २७ गते उच्च अदालत पोखरामा निवेदन दिएका थिए ।
उच्च अदालत पोखराले २०७९ साल मंसिर १३ गते जाहेरी दर्ता गरेर प्रक्रिया अगाडि बढाउन आदेश दिएको थियो ।
सोही आदेशका आधारमा अणनाथको जाहेरी दर्ता भइसकेका कास्की प्रहरी प्रवक्ता डिएसपी श्रवणकुमार विकले जानकारी दिए ।
प्रकाशित मिति २०७९ फागुन २९ गते सोमबार ०९:१०
