ताङतिङ नौंचुपैंगी लामा महायान गुम्बा उद्घाटन

पाेखरा
कास्कीको ताङतिङमा नौंचु पैंगीलामा महायान बौद्व गुम्बाको उद्घाटन भएको छ । गत असारमा पुनर्निर्माण गरिएको भवनको उद्घाटन शुक्रबार गण्डकीका प्रदेश प्रमुख पृथ्वीमान गुरुङले गरेका हुन् ।

कार्यक्रममा प्रदेश प्रमुख गुरुङले भाषा, संस्कार र संस्कृतिको जगेर्नामा अरु गुरुङ गाउँ भन्दा ताङतिङअगाडि रहेको सुनाए ।

‘पञ्चायत कालमा धार्मिक स्वतन्त्रता थिएन । तर, मुलुकमा व्यवस्था परिवर्तन भएपछि सबै जातजातिहरुले आफ्नो भाषा, संस्कार र संस्कृतिको विकास गर्न पाएका छन्,’ उनले भने, ‘फलस्वरूप अहिले जुन सुकै गुरुङ गाउँ जानु त्यहाँ अत्याधुनिक गुम्बा निर्माण भएको छ ।’

उनले बुद्धको पुजा गर्दैमा बौद्व धर्मलम्वी नहुने र असली बौद्व धर्मलम्वी हुन बुद्धको पञ्चशिललाई आफ्नो जीवनमा लागू गर्नुपर्ने बताए ।

कार्यक्रममा बौद्व अर्घौं सदन रामघाटका प्रमुख लामागुरु सिरलामा सहित २ दर्जनभन्दा बढी बौद्धलामाले ३ दिन पूजापाठ गरेका थिए ।