रुपन्देहीका देश बन्धु आचार्य समकालिन साहित्यका छाेटा विधाहरूमा कलम चलाउने लेखक हुन् । अध्ययनका क्रममा हाल पोखरामा रहेका देश बन्धुले साहित्यसंगै कलालाई समेत सम सिर्जनाका साथ अगाडी बढाईरहेका छन्। थाेरै शव्दमा समकालिक विषय उजागर गर्ने उनका कविताहरू समर्थ छन ।
कविता – गाउँघर
मानौँ बाटैबाट, खेतै खेत, कान्लै कान्ला हुँदै
कुनै खुसीको खबर सुनाउन
हास्याङ्फस्यङ गर्दै दगुरेका केटाकेटी जस्तो
चोकतिरबाट माइकका आवाजहरू म तिर आइरहेछ्न् ।
सुनिरहेछु
घरको धुरिमा बसेर गिज्याइरहने
चोर जस्ता दुखहरू अब पल्किने छैनन् रे ।
साँझपख भान्साबाट खस्दैनन् रे रित्ता भाँडा ।
उ भन्दै छ
पुरानो घरको मक्किएको माटोबाट अब बन्नेछ्न् रे
सम्भावनाका पर्खाल ।
हामीले लगाएका आशाका बोटहरू हाम्रै हुने छ्न् रे,
भन्दै छ अब देखि कोहि नोकर हुनु पर्दैन ।
भाउजूहरू अब एक्लै बजार जानू पर्दैन
बोलाउँदा हुन्छ माल्दाई साँल्दाई कोको हुनुहुन्छ मुग्लानमा
आइन्दा कुनै साहुले तमसुक देखाउँदै समाउँदैनन् रे आँचल ।
यस्तै यस्तै आइरहेको थियो आवाज
मानिलिनुस् अब भोकले कोहि रुनु पर्दैन रे,…..
सोचिरहेछु!
को होला उ यतिबिधी गाउँको पिर लिने ?
हुन त गाउँमा चुनाव जो हुँदै छ ।
