पोखरा
पोखरामा जारी लामाचौर भलिबल कपमा एभरेष्ट भलिबल क्लबले तेस्रो हार व्यहोरेको छ ।
आइतबार विहान भएको खेलमा विभागीय टोली सशस्त्र प्रहरी बलको एपीएफ क्लबसँग ३–० को सोझो सेटमा पराजीत गरेको हो ।
पहिलो सेटमा एपीएफले २५–१६ को जीत निकाल्यो । दोस्रो सेटमा एभरेष्ट झन् कमजोर प्रदर्शन हुँदा एपीएफले २५–१४ को जीत दर्ता गरायो ।
तेस्रो सेटमा २५–१७ को जीत निकाल्दै एपीएफले पहिलो जीत दर्ता गराएको हो । शनिबार न्यु डायमण्डसँग एपीएफ ३–२ को सेटमा पराजीत भएको थियो ।
एभरेष्ट भलिबल क्लब पहिलो खेलमा न्यु डायमण्ड र दोस्रो खेलमा नेपाल पुलिस क्लबसँग पराजित भएको हो ।
महिलातर्फको न्यु डायमण्ड र नेपाल पुलिस क्बलबीच प्रतिस्पर्धा भइरहेको छ ।
आइतबार नै विभागीय टोली पुलिस र एपीएफको भिडन्त हुनेछ ।
१० औं संस्करणको राष्ट्रियस्तरको महिला भलिबलमा पुलिस, एपीएफ, न्यु डायमण्ड र एभरेष्ट प्रतिस्पर्धामा छन् ।
नवआदर्श सामुदायिक विकास समाजले आयोजना गरेको महिला पुरुष भलिबल प्रतियोगिताको विजेताले १ लाख ५० हजार १११ रुपैयाँको साथमा ट्रफी, मेडल र प्रमाणपत्र प्राप्त गर्नेछन् ।
दोस्रो हुनेले १ लाख १११ रुपैयाँ र तेस्रोले ५० हजार १११ रुपैयाँको साथमा ट्रफी, मेडल र प्रमाणपत्र प्राप्त गर्नेछन् ।
प्रकाशित मिति २०८० भदौ ३१ गते आइतबार ०९:२२
