फिर्के खोलामाथिका संरचना नहटाउन पोखरा महानगरलाई उच्च आदेश

पाेखरा

फिर्के खोला मिचेर बनेका संरचना हटाउन ३५ दिन सूचना निकालेको पोखरा महानगरपालिकालाई उच्च अदालत पोखराले रोक लगाएको छ ।

पोखराका मेयर धनराज आचार्यले अर्को महिनाको मध्यतिर फिर्के माथि बनेका संरचना भत्काउने योजनासहित ३५ दिने सूचना निकालेका थिए ।

मेयरको कदमलाई उच्च अदालत पोखराले अन्तरिक आदेशमार्फत रोक लगाइदिएको हो । न्यायाधीश मीलन राईको एकल इजलासले मापदण्डभित्र परेका संरचना नभत्काउन आन्तरिम आदेश जारी गरेको छ ।

महानगरले ३५ दिने सूचना जारी गरेपछि फिर्के खोलाको संरचनामाथि बनेको फिर्के तमु समाज समेतले रिट दायर गरेका थिए ।

रिटउपर वरिष्ठ अधिवक्ता तिलक पराजुली, वरिष्ठ अधिवक्ता मुकुन्द अर्याल, अधिवक्ता केशवप्रसाद पराजुलीले बहस गरेका थिए ।

अदालतको आदेशपछि पोखराका मेयर धनराज आचार्यले खोलामाथि बनेका संरचना हटाउने भनिएको तर लालपूर्जा भएका स‌ंरचना नहटाइने बताएका छन् ।  मेयर आचार्यले अदालतमा लिखित पेश गर्ने बताए ।