म्याग्दी
पर्वतारोहणको क्षेत्रमा विश्वमै दुलर्भ कीर्तिमान कायम गरेका निर्मल पूर्जा ‘निम्स’ (एमबीइ)ले हेलिकप्टर चार्टर गरेर जन्मथलो म्याग्दीमा आएर गैरआवासीय नेपाली नागरिकता बनाएका छन् ।
बेलायती सेनाको विशेष सैनिक फोर्सबाट अवकाश लिएका पूर्जा गैरआवासीय नेपाली नागरिकता लिन काठमाडौबाट कैलाश एयरको हेलिकप्टर चार्टर गरेर बेनी आएका थिए । उत्तरी म्याग्दीको अन्नपूर्ण गाउँपालिका–३, दानामा जन्मिएका पुर्जालाई प्रमुख जिल्ला अधिकारी तुलसीराम पौडेलले गैरआवासीय नागरिकता हस्तान्तरण गरेका थिए ।
उनले गैरआवासीय नागरिकताले मातृभूमिप्रति गौरवान्वित भएको बताउँदै नागरिकताको सुविधाले गैरआवासीय नेपालीको लगानी भित्राउनसमेत सहज हुने बताए । जन्मभूमी म्याग्दीमै रहेका धौलागिरी र अन्नपूर्ण हिमालबाट ८ हजार मिटरभन्दा अग्ला संसारका १४ वटा हिमाल चढेर विश्व रेकर्ड सहित अन्य विभिन्न किर्तिमानी समेत रहेको पूर्जाले हालै संसारको अग्लो सगरमाथा हिमालबाट स्काइभ डाइभ समेत गरेका थिए ।
जाडो सिजनमा विश्वकै दोस्रो अग्लो ‘के–टु’ हिमालको समेत आरोहण गरी विश्वभरका आरोहीलाई चकित पार्ने किर्तीमानी समेत कायम गरेका छन् । नागरिकता लिएपछि बेनीमा १५ मिनेट बिताएका पुर्जा हेलिकप्टरबाटै अमादम्बा हिमालतर्फ लागेका थिए ।
जिल्ला प्रशासन कार्यालय म्याग्दीले कत्तिक १७ गतेदेखि गैरआवासीय नेपालीलाई नागरिकता वितरण गर्न थालेको थियो । हालसम्म ४ जनाले गैरआवासीय नेपाली नागरिकता प्राप्त गरेको प्रजिअ पौडेलले बताए ।
४० जनाले गैरआवासीय नेपाली नागरिकताका लागि निवेदन पेश गरेको प्रजिअ पौडेलले बताए । यसअगाडी म्याग्दीबाट घवलागिरी गाउँपालिका वडा नं ६ मराङ घर भई हाल अष्टे«लियामा बस्ने दिपक भण्डारी र सोही गाउँपालिकााको वडा नं ७ ताकम घर भई हाल अमेरिका बस्ने ऋषिनाथ सुवेदीले पहिलोपटक एकैदिन लिएका थिए ।
प्रकाशित मिति २०८० कात्तिक २४ गते शुक्रबार ०६:२४
