फिस्टेल रेसिङ कपको मेन इभेन्ट शनिबार

पोखरा । पोखरामा जारी फिस्टेल रेसिङ कपको मेन इभेन्ट शनिबार हुने भएको छ ।

भिआर–४६ मोटर स्पोर्टसको आयोजनामा जारी खेलमा शुक्रबार छनोट चरणका खेलहरु सकिएका छन् । शनिबार हुने मेन इभेन्टबाट विजेताको छिनोफानो लाग्ने नेपाली रेसिङ एसोसियसन नेपालका अध्यक्ष माइकल थापाले बताए ।

‘‘शनिबार पहिलो चरणमा ७० सहभागीमध्येबाट ४० जना छनोट गरिनेछ । छनोट भएका ४० ले अर्को राउन्डमा प्रतिस्पर्धा गर्नेछन् र सो राउन्डबाट १० जना छनोट गरेर प्रतियोगिताको फाइनल प्रतिष्पर्धा गराइनेछ,’ माइकलले भने ।

फाइनल राउन्डका १० जनामध्येबाट प्रथम, द्वितीय र तृतीयका रुपमा विजेता घोषित गरिने उनले बताए । विजेताले इन्टरनेसनल रेस इभेन्टमा सहभागिता जनाउनुका साथै क्रमश १ लाख, ७५ हजार र ५० हजार रुपैँया नगद प्राप्त गर्नेछन् ।

यामाहा मोर्टसको मुख्य प्रायोजनमा आयोजित प्रतियोगिता गर्न करिब ४० लाख खर्च लाग्ने आयोजकको भनाइ छ ।