‘आफ्नै कम्पनीबाट काम थालेका थिए, घरको लिफ्टबाट खसेर बिते’

पोखरा

पोखरामा लिफ्टबाट खसेर एक इन्जिनियरको मृत्यु भएको छ ।

मंगलबार दिउँसो १ बजे पोखरा महानगरपालिका–६ खरेचोकमा चिनिमाया भण्डारीको निर्माणाधीन घरको पाँचौं तलाको लिफ्टबाट खस्दा ३७ वर्षका प्रवीण भट्टराईको मृत्यु भएको हो ।

जिल्ला प्रहरी कार्यालय कास्कीकाअनुसार पोखरा रत्नचोकका भट्टराईले २ महिना अगाडिमात्रै आफ्नै कम्पनी खोलेर काम थालेका थिए ।

लामो समय न्यूरोडस्थित मुक्ति इनर्जी प्रालिमा कार्यरत भट्टराईले आफ्नै कस्मिक पावर सोलुसन स्थापना गरेर काम गरिरहेका थिए ।

निर्माणाधीन घरमा तातो पानी आउने प्रणाली हेर्न जाँदा लिफ्ट हाल्न खुला रहेको भागबाट खसेका हुन् ।

लिफ्टकै कामसमेत गर्न जाँदा त्रिपालले छोेपेर राखिएको खुला ठाउँबाट खसेको बताइएको छ ।

गम्भीर घाइते भएका उनलाई तत्कालै गण्डकी मेडिकल कलेजमा लगिएको थियो ।

उनको उपचारका क्रममा साढे २ बजे मृत्यु भएको जिल्ला प्रहरी कार्यालयले जनाएको छ ।

इलेक्ट्रिक इन्जिनियर भट्टराईका बुवाआमा, श्रीमती र दुई छोरा छन् ।