वरिष्ठ फुटबल प्रशिक्षक सम्भु केसीलाई सम्मान गरिने
पोखरा
बगर भाइ खलकले बर्सेनि आयोजना गर्दै आएको ‘अन्तर्राष्ट्रिय बगर भाइखलक भेट्रान फुटबल प्रतियोगिता’को १३ औं संस्करण माघ २१ गतेदेखि हुने भएको छ ।
माघ २७ गतेसम्म चल्ने उक्त प्रतियोगितामा भारतका २ सहित ३६ टिम सहभागी हुने संस्थाका अध्यक्ष दिलबहादुर गुरुङले जानकारी दिए ।
२०२८ देखि पोखराको टुँडिखेल मैदानमा निरन्तर हुँदै आएको प्रतियोगितामा यसपटक ४०, ५० र ६० वर्षमाथि उमेर समूहमा खेल हुने गुरुङले जानकारी दिए ।
उनका अनुसार गण्डकी प्रदेशका सांसद तथा पूर्वमन्त्री राजीव गुरुङ ‘दीपक मनाङे’ पनि सहभागी हुँदैछन् ।
मनाङे ५० वर्षमाथिको उमेर समूहमा कैलाली जिल्लाको टिमबाट सहभागी हुन लागेका हुन् ।
‘माननीयज्युले सुरुमा ठमेलको टिम ल्याउने भन्नुभएको थियो । तर, ठमेलमा ५० वर्षमाथिको उमेर समूहको टिम नपुगेपछि उहाँ कैलालीको टिमबाट आउनुहुने भएको हो,’ गुरुङले भने ।
प्रतियोगितामा भारतको २ टिमसहित, कास्की, काठमाडौं, ललितपुर, चितनव, सिरहा, हेटौडा, सर्लाही, बुटवल, सिमरा, कैलाली, पाँचथरबाट सहभागी हुने बगर भाइ खलकका महासचिव यामबहादुर गुरुङले जानकारी दिए ।
४० वर्षमाथि उमेर समूहमा २३ टिम, ५० वर्षमाथिको उमेर समूहमा ९ टिम र ६० उमेर समूहभन्दा माथि४ टिम सहभागी हुने आयोजकले जनाएको छ ।
‘यसलाई हामीले प्रतियोगिताभन्दा पनि हाम्रो स्वास्थ्यसँग जोडेका छौं । कुनैबेला ४० वर्षमाथि पनि फुटबल खेल्छन् र ? भन्ने थियो । तर, अहिले हामीले त्यसलाई बदल्न सकेका छौं,’ गुरुङले भने ।
प्रतियोगितामा ४० वर्षमाथि उमेर समूहको विजेताले २ लाख रुपैयाँ र उपविजेताले एक लाख रुपैयाँ प्राप्त गर्नेछन् ।
५० वर्षमाथि उमेर समूहमा विजेताले एक लाख र उपविजेताले ५० हजार रुपैयाँ प्राप्त गर्नेछन् भने ६० वर्ष उमेर समूहमाथिका विजेताले ५० र उपविजेताले ३० लाख रुपैयाँ पाउनेछन् ।
सम्भु केसीलाई सम्मान गरिने
प्रतियोगिताको अवसरमा संस्थाले राष्ट्रिय खेलकुद परिषद्का पूर्व प्रशिक्षक सम्भु केसीलाई सम्मान गर्ने भएको छ ।
केसी हाल वरिष्ठ फुटबल प्रशिक्षक हुन् ।
फुटबल खेल विकासमा विशेष योगदान दिएवापत हरेक वर्ष संस्थाले एकजनालाई सम्मान गर्दै आरहेको छ ।
संस्थाले २०६८ देखि फुटबलको विकासमा योगदान दिएकाहरुलाई २०६८ देखि सम्मान गर्न थालेको हो ।
प्रकाशित मिति २०८० माघ १८ गते बिहीबार ०१:१४
