मित्रमिलन सहकारी ठगी प्रकरणः ७ लाख धरौटीमा छुटे भण्डारी

पोखरा
मित्रमिलन सहकारी ठगी प्रकरणमा समातिएका विष्णुप्रसाद भण्डारी ७ लाख रुपैयाँ धरौटीमा छुटेका छन् ।

जिल्ला अदालत कास्कीका न्यायाधीश रामचन्द्र शर्माको इजलासले भण्डारीलाइ धरौटीमा छोड्ने आदेश गरेको हो ।

मित्रमिलन सहकारी प्रकरणमा सोमबार साँझ पक्राउ परेका पोखराको पृथ्वीनारायण क्याम्पस पोखराका सहप्राध्यापक भण्डारी थुनछेक बहसपछि धरौटीमा छाड्ने आदेश भएको कास्की जिल्ला अदालतका श्रेस्तेदार रुद्रप्रसाद अर्यालले जानकारी दिए ।

मित्रमिलन सहकारी ठगी प्रकरणमा ३३ जनालाई पक्राउ पुर्जी जारी भएकोमा ८ जना पक्राउ परेका छन् ।

जसमध्ये ६ जना पुर्पक्षका लागि थुनामा छन् भने भण्डारीसहित २ जना धरौटीमा रिहा भएका हुन् ।

यसअघि पक्राउ परेका लेखा समिति संयोजक सूर्य अधिकारीलाई पनि अदालतले धरौटीमा छाड्न आदेश दिएको थियो ।

वडा नम्बर २१ का वडाध्यक्ष दीपक सुवेदीसहित २५ जना अझै फरार छन् ।