कक्षा ११ का विद्यार्थीलाई उपयुक्त
पोखरा
पोखरामा हंगेरियन नाटक ‘रिफन्ड’ मञ्चन हुने भएको छ ।
हंगेरियन लेखक फ्रिज क्यारेन्थीले सन् १९३८ मा लेखेको यो नाटकलाई नारायण न्यौपानेले नेपालीमा अनुवाद गरेका छन् ।
परिवर्तनको निर्देशनमा मञ्चन हुन लागेको नाटकको अहिले रिहलर्सल जारी छ ।
नाटक पोखरा थियटरको प्रस्तुतिमा फागुन १४ गतेबाट गैह्रापाटनमा रहेको गन्धर्व नाटक घरमा नाटक मञ्चन हुने निर्देशक परिवर्तनले जानकारी दिए ।
नाटक फागुन ३० गतेसम्म चल्नेछ ।
कक्षा ११ को अनिवार्य अंग्रेजी विषयमा समावेश गरिएको यो नाटक विद्यार्थी, शिक्षक, अभिभावक सहित नाटकपारखीका लागि उपयुक्त हुने परिवर्तनले जानकारी दिए ।
निर्देशक परिवर्तनले कमेडी जनरामा निर्माण हुने यो नाटकले सन्देश समेत बोकेको बताए ।
‘यो नाटकले घोकन्ते शिक्षा भन्दा व्यवहारिक र सीपमूलक शिक्षामा जोड दिएको छ’, उनले भने ।
नाटकमा रमेश बाबु तिमल्सिना, धनकाजी श्रेष्ठ, मिलन श्रेष्ठ, रोहित पौडेल, आदित्य सुनार, ज्योति हमाल, सुसन पौडेल, रोशनी रामदामले अभिनय गरेका छन् ।
बुकिङ शो मार्फत बिहान, दिउँसो र साँझमा नाटक मञ्चन हुनेछ । खुल्ला शो मार्फत भने नाटक फागुन २६ देखि ३० सम्म साझँ ५ बजे हेर्न पाइनेछ ।
नाटक हेर्न विद्यार्थीको लागि २ सय र अन्यको लागि ३ सय र ५ सय रुपैयाँ शुल्क लाग्नेछ ।
नाटक मञ्चनलाई व्यवस्थित बनाउन मिडिया पार्टनरको रुपमा पब्लिक फोर के टेलिभिजन र इन्टरनेट पार्टनरको रुपमा वल्ड लिंकले सघाउनेछन् ।
नाटक हेर्न इच्छुक विद्यालय तथा समुहगत दर्शकको लागि शो बुकिङ समेत खुल्ला भइसकेको पोखरा थिएटरले जनाएको छ ।
प्रकाशित मिति २०८० फागुन १० गते बिहीबार ०४:३१
