थुनामा राख्ने जिल्लाको आदेशविरुद्ध पत्रकार गिरी पुगे उच्च अदालत

पोखरा

पोखराको मित्रमिलन सहकारी ठगी प्रकरणमा जिल्ला अदालत कास्कीले पुर्पक्षका लागि थुनामा राख्ने आदेशविरुद्ध पत्रकार अर्जुन गिरी उच्च अदालत पोखरा गएका छन् ।

पोखराको ताण्डव न्युजका प्रधान सम्पादकसमेत रहेका गिरीलाई मित्रमिलन सहकारी ठगी प्रकरणमा जिल्ला न्यायाधीश रामचन्द्र शर्माको इजलासले फागुन १० गते पुर्पक्षका लागि थुनामा राख्ने आदेश गरेको थियो ।

आदेशको विपक्षमा उच्च अदालत पोखरामा निवेदन दिएका गिरीलाई थुनामा राख्नुको कारणबारे जिल्ला अदालतसँग कैफियत मगाउने आदेश गरेको हो ।

उच्च अदालत पोखराका न्यायाधीश धनसिंह महराको इजलासले थुनामा राख्नुको कारणबारे जिल्ला अदालतबाट लिखित कैफियत मगाउने आदेश गरेको उपरजिस्ट्रार तथा सूचना अधिकारी विश्वनाथ अधिकारीले जानकारी दिए ।

पूर्व लेखा समिति सदस्यसमेत रहेका गिरीलाई मित्रमिलन सहकारीको रकम ताण्डव न्युज पत्रिका, रेस्टुरेन्ट र घरमासमेत लगाएको अभियोग छ ।

गत मंसिरमै पक्राउ पुर्जी जारी भएपछि फरार भएका गिरी गत बुधबार अदालतमा आफैं उपस्थित भएका थिए । मित्रमिलन सहकारी ठगी प्रकरणमा ३३ जनाविरुद्ध पक्राउ पुर्जी जारी भएको थियो ।

मित्रमिलन सहकारी प्रकरणमा गिरीसहित ७ जना पुर्पक्षका लागि थुनामा पुगेका छन् ।

यसअघि सहकारीका अध्यक्ष रमण पौडेल, पूर्व रजिष्ट्रार उदयबहादुर पराजुली, सहकारी सञ्चालक सदस्य गोपाल खनाल, कार्यकारी अधिकृत किरण अधिकारी, सल्लाहकार÷शेयर सदस्य राजु बराल, शेयर सदस्य बुद्धिसागर पौडेल थुनामा छन् ।

पोखरा महानगर–९, नयाँ बजारस्थित सहकारीका सञ्चालक र अन्य मिलेर करिब २७ करोड रकम अपचलन गरेको आरोप छ ।