काठमाडाैं । नेपाल कम्युनिष्ट पार्टी नेकपा अध्यक्ष पुष्पकमल दाहाल ‘प्रचण्ड’ले दुई सयभन्दा बढी सांसदसहित आफूहरू सर्वोच्च अदालत जाने बताएका छन् । सोमबार बानेश्वरमा प्रचण्ड-माधवकुमार नेपाल निकट सांसदहरूको संसदीय दलको बैठकमा बोल्दै उनले प्रतिनिधि सभा जीवितै रहेको जानकारी सर्वोच्च अदालतलाई दिन आफूहरू त्यसरी जान लागेको बताए ।
यसअघि आजै नेकपाका ९० जना सांसदहरू मन्त्रिपरिषद्को सिफारिसमा राष्ट्रपतिले गरेको प्रतिनिधि सभा विघटनविरूद्ध सर्वोच्च अदालत जाने तयारीमा थिए । अरू दलका सांसदहरूलाई पनि सहभागी गराएरमात्र त्यसरी सर्वोच्च जानु उपयुक्त हुने निष्कर्षपछि आज उनीहरू सर्वोच्च गएनन् ।
बैठकमा बोल्दै प्रचण्डले प्रधानमन्त्री ओलीमा छल र बेइमानी कल्पना गर्न सक्नेभन्दा बढी रहेको बताएका थिए । ‘उहाँमा (प्रधानमन्त्री) छल, बेइमानी यति धेरै भयो कि कल्पनै गर्न सक्दिनँ’, बैठकमा बोल्दै उनले भने । संवैधानिक नियुक्ति विषयलाई लिएर प्रधानमन्त्रीले ढाँटेको उनले बताए ।
प्रकाशित मिति २०७७ पुस ६ गते सोमबार ०८:१०
