पाेखरा । दश वर्षकाे कठिन यात्रा पार गरेर आईसीसी टी–२० विश्वकपसम्म पुगेकाे नेपालले पहिलाे खेलमा नेदरल्याण्डसँग ६ विकेटकाे पराजय व्यहाेरेकाे छ ।
नेपालले दिएको १०७ रनको लक्ष्य नेदरल्यान्डसले १८ दशमलव ४ बलमा ४ विकेट गुमाएर पूरा गर्याे । जीतका लागि नेदरल्यान्डसका म्याक्स ओडाउडले अर्धसतक प्रहार गरे । म्याक्स ५४ रनमा अविजित रहे ।
बिक्रमजित सिंहले २२ रनको योगदान दिए । बलिङमा नेपालका सोमपाल कामी, दीपेन्द्रसिंह ऐरी र अभिनास बोहराले एकएक विकेट लिए । १२ बलमा १३ रन आवश्यक रहेकोमा म्याक्सले १९ औ ओभरको पहिलो र दोस्रो बलमा लगातार चौका र छक्का प्रहार गरेका थिए ।
तेस्रो बलमा एक रन र चौथो बलमा चौका प्रहार गर्दै नेदरल्यान्डस्ले जित पक्का गर्यो ।
यसअघि अमेरिकाको डलासस्थित ग्रान्ड प्रेरी मैदानमा टस हारेर पहिला ब्याटिङको निम्तो पाएको नेपालले १९ ओभर २ बलमा १०६ मा समेटिएको थियो ।
नेपालका लागि कप्तान रोहित पौडेलले सर्वाधिक ३५ रन जोडेका थिए । १० रन जोड्दा ओपनर आसिफ शेखलाई गुमाएको नेपालले १५ रन जोड्दा अर्का ओपनर कुशल भुर्तेललाई गुमाएको थियो ।
आसिफ ४ र कुशल ७ रन बनाएर आउट भए । ४० रन जोड्दा अनिल शाह, ५२ रन जोड्दा कुशल मल्ल र ५३ रन जोड्दा दीपेन्द्रसिंह ऐरी आउट भए । अनिल ११, कुशल मल्ल ९ र दीपेन्द्र १ रन जोडे । सोमपाल कामी ०, गुल्सन झा १४ र करन केसीले १७ रन जोडेर आउट भए ।
बलिङमा नेदरल्यान्डसका टीम प्रीङल र लोलन भान विकले ३-३ विकेट लिए । पाउल भान मिर्केन र बास डी लेडीले २-२ विकेट लिए ।
प्रकाशित मिति २०८१ जेठ २३ गते बुधबार ०१:१६
हजुरको प्रतिक्रिया
