पोखरा
पोखराको फेवातालमा डुंगा दौड प्रतियोगिता हुने भएको छ ।
फेवा डुंगा व्यवसायी संगठनले डुंगा दौड प्रतियोगिता आयोजना गरेको हो । संगठनको ३० औं स्थापना दिवसका अवसरमा जेठ ३१ गते प्रतियोगिता गर्न लागिएको अध्यक्ष बलराम गिरीले बताए ।
पर्यटकीय राजधानी पोखराको प्रबद्र्धनमा सघाउन एक दिने उत्सव मनाउन लागेको उनको भनाइ छ ।
आन्तरिक तथा बाह्य पर्यटक भित्रयाउने उद्देश्यले आयोजना गरिएको प्रतियोगितामा ४० समूह सहभागी हुने सचिव सचिव शिव जिसीले जानकारी दिए । उनका अनुुसार प्रतिस्पर्धी समूहमा तीन जना अनिवार्य गरिएको छ ।
काठको डुंगा चलाएर पुरुषतर्फको समूहले २.१ किलोमिटर प्रतिस्पर्धा गर्नुपर्नेछ ।महिलातर्फ १.५ किलोमिटर दुरीमा प्रतिस्पर्धा हुनेछ ।
पुरुषतर्फको विजेताले ३० हजार हजार रुपैयाँ हात पार्नेछ । उपविजेता र तेस्रो हुनेले क्रमशः २० हजार र १० हजार रुपैयाँले पुरस्कृत हुनेछन् ।
महिलातर्फ विजेताले २० हजार रुपैयाँ हात पार्दा उपविजेताले १५ र तेस्रो हुनेले १० हजार रुपैयाँ पाउनेछन् ।
बाराहीघाटमा डुंगा दौड प्रतियोगिता सुरु हुनेछ । प्रतियोगिता सम्पन्न गर्न २ लाख ४० हजार रुपैयाँ खर्च लाग्ने अनुमान छ ।
प्रतियोगिताबाट बचत भएको रकम फेवातालको सरसफाईमा खर्चिने जनाइएको छ ।
प्रकाशित मिति २०८१ जेठ २५ गते शुक्रबार ०७:५८
