काभा यु–२० महिला भलिबल : नेपालले आज कीर्गिस्तानसँग खेल्दै

पोखरा ।

माल्दिभ्समा जारी काभा यु–२० महिला भलिबल च्याम्पियनसिपमा नेपालले फाइनल प्रवेशका लागि आज किर्गिस्तानको सामना गर्दैछ ।

लिग चरणमा दोस्रो भएको कीर्गिस्तान र तेस्रो भएको नेपालबीचको खेल आज राति नेपाली समय अनुसार सवा ९ बजे सुरु हुनेछ । यो खेलको विजेता फाइनल पुग्नेछ ।

त्यसअघि लिगमा पहिलो भएको श्रीलंका र चौंथो भएको माल्दिभ्सबीच पहिलो सेमिफाइनल हुनेछ । पहिलो सेमिफाइनल स्थानीय समयअनुसार ४ बजे हुनेछ।

लिग चरणमा श्रीलंकाले सबै तीन खेल जित्दै शीर्ष स्थानमा रहेको थियो । कीर्गिस्तानले दुई तथा नेपालले एक खेल जित्दा माल्दिभ्स सबै तीन खेलमा पराजित भएको थियो ।

लिग चरणमा नेपाल कीर्गिस्तानसँग सोझो सेटमा पराजित भएको थियो । आज नेपालसामु कीर्गिस्तानविरुद्ध लिग चरणमा बेहोरेको हारको बदला लिने अवसर छ ।

आजको खेल जसरी पनि जित्दै फाइनल पुग्ने नेपालको लक्ष्य छ ।