पोखरा ।
साफ यू–२० फुटबल च्याम्पियनसिप अन्तर्गत पहिलो सेमिफाइनलमा आज नेपाल र भुटान खेल्दैछन् ।
खेल दिउँसो ३ बजेदेखि एन्फा कम्प्लेस सातदोबाटोमा सुरु हुने छ । नेपाल समूह ’ए’ को विजेता र भुटान समूह ’बी’ को उपविजेता बन्दै सेमिफाइनलमा पुगेका हुन् ।
नेपालले पहिलो खेलमा श्रीलंकालाई १–० ले दोस्रो खेलमा बंगलादेशलाई २–१ ले पराजित गरेको थियो । उता भुटान भने समूह बी को उपविजेता बन्दै अन्तिम चारमा पुगेको हो ।
पहिलो खेलमा साविक विजेता भारतसँग १–० ले पराजित भए पनि दोस्रो खेलमा माल्दिभ्सलाई २–१ ले पराजित गरेपछि भुटान पनि भारतसँगै सेमिफाइनल पुगेको हो ।
यस्तै दोस्रो सेमिफाइनलमा भोलि भारत र बंगलादेश खेल्नेछन् । लगातारको वर्षाका कारण दशरथ रंगशालाको मैदान हिलो हुँदा सेमिफाइनल खेल पनि सातदोबाटोमा रहेको एन्फा कम्प्लेक्समै हुने भएको हो ।
यसअघि अखिल नेपाल फुटवल संघ (एन्फा)ले सेमिफाइनलका खेलहरु दशरथ रंगशालामा हुने बताएको थियो ।
तर साफले पठाएको म्याच कमिस्नरले त्रिपुरेश्वरमा रहेको दशरथ रंगशालाको मैदान अझै खेलाउन योग्य नदेखिएको रिपोर्ट दिएपछि खेल्ने ठाउँ सारेको एन्फा प्रवक्ता सुरेश शाहले जानकारी दिए ।
च्याम्पियनसिप फाइनल खेल भने आउँदो बुधबार दशरथ रंगशालामा हुनेछ ।
प्रकाशित मिति २०८१ भदौ ९ गते आइतबार १०:०६
