पोखरा ।
विश्वकप छनोटअन्तर्गत लिग–२ को तयारीका लागि नेपालले श्रीलंकासँग एकदिवसीय शृंखला खेल्ने भएको छ ।
नेपाल क्रिकेट संघ (क्यान)ले जनाएअनुसार नेपालले यसका लागि श्रीलंका भ्रमण गर्नेछ र एकदिवसीय शृंखलामा घरेलु टोली श्रीलंका डेभलभमेन्ट टिमसँग ३ एकदिवसीय खेल खेल्नेछ ।
क्यानका अनुसार नेपालले सेप्टेम्बर २ देखि ९ सम्म श्रीलंकामा अभ्यास गर्ने भएको हो । नेपालले भ्रमणमा रहँदा श्रीलंका डेभ्लपमेन्ट टोलीसँग ३, ५ र ७ सेप्टेम्बरमा तीन एकदिवसीय अभ्यास खेल खेल्ने क्यानले जनाएको छ ।
नेपालले स्थानीय क्लबसँग ३ ओटा अभ्यास खेल पनि खेल्ने क्यानले जनाएको छ ।
क्यानले श्रीलंका भ्रमणमा जाने राष्ट्रिय क्रिकेट टोलीको घोषणा गरेको छ । आईसीसी विश्वकप लिग–२ को तयारीस्वरुप श्रीलंका क्याम्पका लागि क्यानले १९ सदस्यीय टोलीको घोषणा गरेको हो ।
क्यानले हिजो घोषणा गरेको टोलीमा कप्तान रोहित पौडेलसँगै, दीपेन्द्रसिंह ऐरी, कुशल भुर्तेल, सन्दीप लामिछाने, करण केसी, सोमपाल कामी, कुशल मल्ल, गुलशन झा र ललितनारायण राजवंशी रहेका छन् ।
टोलीमा आसिफ सेख, आरिफ सेख, अनिल कुमार साह, देव खनाल, भीम सार्की, अर्जुन साउद, रिजन ढकाल, आकाश चन्द, सागर ढकाल र सन्दीप जोरा पनि समावेश छन् ।
विश्वकप लिग–२ आगामी सेप्टेम्बरमा क्यानडामा हुनेछ ।
