पोखरा ।
एभरेस्ट महिला भलिबल लिगको उपाधिका लागि आज कर्णाली र ललितपुरले खेल्ने भएका छन् ।
कर्णाली र ललितपुरबीचको फाइनल खेल आज बेलुका साढे ५ बजे दशरथ रंगशालाको कभर्ड हलमा हुनेछ ।
लिगमा कर्णाली यश्विज अपराजित रहँदा ललितपुर क्विन्स पनि फाइनलमा पुग्यो ।
गएराति भएको लिगको अन्तिम खेलमा कर्णालीले काठमाण्डौ स्पाइकर्सलाई ३–१ ले पराजित गरेपछि फाइनल समिकरण बनेको हो । कर्णाली यसअघि नै फाइनलमा पुगिसकेको थियो ।
ललितपुरले हिजो भएको खेलमा चितवन शक्तिलाई हराउँदै दोस्रो स्थानमा पुगेको थियो ।
कर्णालीको ५ खेलमा १३ अंक तथा दोस्रो स्थानमा रहेको ललितपुरको समान ५ खेलमा १० अंक रह्यो । काठमाण्डौ भने ९ अंक सहित तेस्रो स्थानमा रहँदा फाइनल खेल्न पाएन ।
यो खेलमा कर्णाली अपराजित यात्रालाई निरन्तरता दिँदै उपाधि चुम्ने लक्ष्यमा हुँदा ललितपुर क्विन्स भने अघिल्लो हारको बदला लिने लक्ष्यमा हुनेछ ।
नेपालको पहिलो फ्रेन्चाइज भलिबल प्रतियोगितामा सहभागी ६ टोलीमध्ये काठमाडौं तेस्रो स्थानमा रहेर प्रतियोगिताबाट बाहिरियो भने चितवन शक्ति र गण्डकी चौथो र पाँचौ स्थानमा रहे ।
सबै खेलमा पराजित भएको मधेश युनाइटेड भने अंकविहीन रहँदै प्रतियोगिताबाट बाहिरिएको छ ।
प्रकाशित मिति २०८१ असोज १९ गते शनिबार ०९:४०
