बार्सिलोनाले एल्चेलाई ३–० ले हरायो

एजेन्सी । कप्तान लियोनेल मेस्सीले हानेका दुई गोलको मद्दतमा बार्सिलोनाले एल्चेलाई पराजित गरेको छ । स्पेनिस ला लिगा अन्तर्गत बुधबार राति भएको खेलमा घरेलु टोली बार्सिलोनाले एल्चेलाई ३–० ले हराएको हो ।

यो दुई गोलसँगै मेस्सीले लिगमा आफ्ना गोलको संख्या १८ पुर्‍याएका छन् । योसँगै उनी सर्वाधिक गोलकर्ता बनेका छन् । दोस्रो सर्वाधिक गोलकर्ता भने १६ गोल गरेका एट्लेटिको म्याड्रिडका लुइस सुआरेज भएका छन् ।

पहिलो हाफ गोलरहित बराबरीमा सकिएको खेलमा सबै गोल त्यसपछि गरिएका हुन् । खेलको ४८औं मिनेटमा मार्टिन ब्रेथवेटको पासमा कप्तान मेस्सीले गोल गोल गर्दै टोलीलाई सुरुवाती अग्रता दिलाए । ६८औं मिनेटमा उनले दोस्रो गोल गरे । त्यसको ५ मिनेटमा जोर्डी अल्बाले गोल गर्दै जित सुनिश्चित पारे ।

जितसँगै बार्सिलोना अंक तालिकाको तेस्रो स्थानमा उक्लिएको छ । बार्साले २४ खेलमा ५० अंक जोडेको छ ।