पोखरा ।
मलेसियामा जारी यु–१९ महिला एसिया कप क्रिकेटमा नेपालले आज बंगलादेशसँग सुपर–४ को अन्तिम खेल खेल्दैछ ।
खेल मलेसियाको बायोमास ओभलमा बिहान ११ः४५ बजे सुरु हुने छ ।
भारत र श्रीलंकाबिचको खेल वर्षाका कारण रद्द भएसँगै नेपालले ४ अंक जोडेको छ । तीन खेलबाट चार अंक जोडेको छ ।
तीन खेलमा समान चार अंक भएको बंगलादेशले पनि तीन खेल खेलेको छ । आज बंगलादेशलाई पराजित गरे नेपालले फाइनलमा स्थान सुरक्षित गर्नेछ ।
तर आजको खेलमा पराजित भएमा या खेल रद्द भएमा नेपाल फाइनल पुग्न असफल हुनेछ ।
जारी प्रतियोगितामा भारतले भने फाइनमा स्थान सुरक्षित गरिसकेको छ ।
सुपर–४ मा नेपालसहित भारत, बंगलादेश र श्रीलंका छन् । भारत ५ अंकसहित पहिलो, बंगलादेश ४ अंकसहित दोस्रो, समान ४ अंकसहित नेपाल तेस्रो र ३ अंकसहित श्रीलंका चौथो स्थान छ ।
पहिलो र दोस्रो स्थानमा रहने टोलीले फाइलन खेल्नेछन् । समूह चरणमा भारतसँग अंक बाडेको नेपालले पाकिस्तानलाई ३ विकेटले पराजित गरेको थियो ।
महिला एशिया कपको फाइनल खेल पर्सि आइतबार हुनेछ ।
प्रकाशित मिति २०८१ पुस ५ गते शुक्रबार ०९:२६
