आलोचनापछि राेकियो पोखरा महानगरको जनप्रतिनिधिका छोराछोरीलाई एमबिबिएस पढ्न छात्रवृत्ति दिने निर्णय

पोखरा
जनप्रतिनिधि र कर्मचारीका एमबिबिएस पढ्ने छोराछोरीलाई छात्रवृत्ति उपलब्ध गराउने विवादास्पद निर्णयबाट पोखरा महानगरपालिका पछि हटेको छ ।

चौतर्फी आलोचनापछि पोखरा महानगरपालिकाले सोमबार विज्ञप्ती जारी गर्दै निर्णय स्थगित भएको जनाएको छ ।

यसअघि कर्मचारीका सन्तानलाई मात्र छात्रवृत्ति दिने व्यवस्था भएकोमा जनप्रतिनिधिका सन्तानलाई पनि समेट्ने गरी कार्यविधि संशोधन गरिएपछि विरोध भएको हो । महानगरको छात्रवृत्ति समितिको पुस २ गते बसेको बैठकले छात्रवृत्ति उपलब्ध गराउने निर्णय गरेको थियो ।

पोखरा महानगरपालिकाले २०७५ सालमा ‘संस्थागत विद्यालय छात्रवृत्ति वितरण कार्यविधि’ निर्माण गरेको थियो । यो कार्यविधिले विभिन्न कोटा निर्धारण गरेर विशेष गरी कक्षा ११ मा विद्यार्थी छनोट गर्दै आएको थियो । त्यही कार्यविधिमा टेकेर गत साल झण्डै ४ सय जनालाई पोखरा महानगरले छात्रवृत्ति प्रदान गरेको थियो ।