पोखरा ।
आईसीसी यू–१९ महिला टी–२० विश्वकप खेल्न नेपाली महिला टोली आज मलेसिया जाँदैछ ।
पहिलो पटक टी–२० विश्वकप खेल्न लागेको टोली दिउँसो त्यसतर्फ प्रस्थान गर्ने नेपाल क्रिकेट संघ (क्यान) ले जनाएको छ ।
आईसीसी यू–१९ महिला टी–२० विश्वकप क्रिकेट खेल्न मलेसिया जाने नेपाली टोलीलाई हिजो बिदाइ गरिएको थियो ।
गएको महिना भएको १९ वर्षमुनिको एशिया छनोटमा च्याम्पियन बन्दै नेपालले पहिलो पटक विश्वकपमा स्थान बनाएको हो ।
१९ वर्षमुनिको महिला टी–२० विश्वकप आउँदो जनवरी १८ तारिख अर्थात् माघ ५ गतेदेखि फेब्रुअरी २ तारिख अर्थात् माघको २० गतेसम्म चल्नेछ ।
प्रतियोगितामा १६ वटा टोलीलाई चार समूहमा विभाजन गरिएको छ । नेपाल रहेको समूह ‘डी’ मा अस्ट्रेलिया, बंगलादेश र स्कटल्यान्ड छन् ।
नेपालले पहिलो खेलमा माघ ५ गते बंगलादेशसँग खेल्नेछ । यस्तै नेपालले दोस्रो खेलमा माघ ७ गते स्कटल्यान्डसँग र तेस्रो खेलमा माघ ९ गते अस्ट्रेलियासँग खेल्ने तालिका छ ।
हरेक समूहको शीर्ष तीन टोली सुपर सिक्समा पुग्नेछन् ।
क्यानले कप्तान पूजा महतोको कप्तानीमा यसअघि नै १५ सदस्यीय टोली घोषणा गरिसकेको छ ।
