पोखरा ।
२४ औं संस्करणको आहा रारा पोखरा गोल्डकप फुटबल प्रतियोगिताको सबै तयारी पूरा भएको छ ।
आयोजक सहारा क्लब पोखराले आइतबार पोखरामा पत्रकार सम्मेलन गरि तयारीको बारेमा जानकारी गराएको हो । आयोजकले आहा रारा गोल्डकपको ट्रफी, व्यक्तिगत अवार्ड र गोल्डकपमा प्रयोग गर्ने जर्सी सार्वजनिक गरेको छ ।
प्रतियोगिता मंगलवारबाट पोखरा रंगशालामा सुरु हुनेछ । उद्घाटन खेल आयोजक सहारा क्लब र आठ पटकको च्याम्पियन नेपाल पुलिस क्लबबीच हुनेछ । १२ टोलीको सहभागिता रहने प्रतियोगितामा उज्वेकिस्तानको ब्ल्याक बुल्स एफसी सहित ३ विदेशी टोलीले प्रतिस्पर्धा गर्नेछन् ।
ब्ल्याक बुल्ससहित सहभागी हुने ए डिभिजनका टोलीमा साविक विजेता त्रिभुवन आर्मी फुटबल क्लब, थ्री स्टार क्लब, मछिन्द्र, एनआरटी, चर्च ब्वाइज, संकटा क्लब, र नेपाल पुलिस क्लब छन् । आयोजना सहारा, एपिएफ, बिग्रेड ब्वाइज युके र भारत सिक्किमको थन्डरबोल्ट नर्थ युनाइटेड छन् ।
प्रतियोगिताको संरक्षकका रुपमा पोखरा महानगरपालिका रहेको छ । प्रतियोगिताको मुख्य प्रायोजकमा हिम श्री फुड्स प्रालिको उत्पादन रारा तयारी चाउचाउ रहेको छ ।
प्रतियोगिताको विजेताले १२ लाख १ हजार र दोस्रो हुने टोलीले ६ लाख १ हजार रुपैयाँ प्राप्त गर्नेछ । प्रतियोगिता संचालनबाट बचत रकम क्लबबाट संचालित सूर्यबहादुर केसी एकेडेमीमा रहेका अनाथ बाल बालिकाको लागि खर्च गरिनेछ ।
प्रकाशित मिति २०८१ माघ २० गते आइतबार ०२:०६
