पोखरा ।
२४औं संस्करणको आहा रारा पोखरा गोल्डकप फुटबल प्रतियोगिता आजदेखि सुरु हुँदैछ ।
सहारा क्लब पोखराका आयोजनामा पोखरा रंगशालामा २४औं संस्करणको आहा रारा फुटबल प्रतियोगिता सुरु हुन लागेको हो ।
प्रतियोगिताको उद्घाटन खेल आयोजक सहारा क्लब र ६ पटकको च्याम्पियन नेपाल पुलिस क्लबबीच हुँदैछ । उद्घाटन खेल आज दिउँसो साढे २ बजेबाट सुरु हुँदैछ ।
प्रतियोगितामा ३ विदेशी टोलीसहित १२ टोलीले सहभागिता जनाएका छन् ।
उज्वेकिस्तानको ब्ल्याक बुल्स एफसीसहित सहभागी हुने ए डिभिजनका टोलीमा साविक विजेता त्रिभुवन आर्मी फुटबल क्लब, थ्री स्टार क्लब, मछिन्द्र, एनआरटी, चर्च ब्वाइज, संकटा क्लब, र नेपाल पुलिस क्लब छन् ।
आयोजना सहारा, एपिएफ, बिग्रेड ब्वाइज युके र भारत सिक्किमको थन्डरबोल्ट नर्थ युनाइटेडले पनि सहभागिता जनाएका छन् ।
प्रतियोगिताको मुख्य प्रायोजकमा हिम श्री फुड्स प्रालिको उत्पादन रारा तयारी चाउचाउ रहेको छ ।
प्रतियोगिताको विजेताले १२ लाख १ हजार र उपविजेता हुने टोलीले ६ लाख १ हजार रुपैयाँ प्राप्त गर्नेछ ।
आहा रारा पोखरा गोल्डकपबाट बचत हुने रकम आयोजक सहाराले क्लबले सूर्यबहादुर केसी स्मृति सहारा फुटबल एकेडेमीमा खर्च गर्दै आएको छ । एकेडेमीमा ३० जना बालक आश्रित छन् ।
प्रकाशित मिति २०८१ माघ २२ गते मंगलबार ०९:३४
