गोरखा जिल्लामा एचपिभी खोप अभियानको सुरु

गोरखा ।

गोरखामा आजदेखि एचपिभी (ह्युमन पपिलोमा भाइरस) खोप लगाउने अभियान सुरु भएको छ ।

गोरखा नगरपालिका–९, लक्ष्मी बजारमा रहेको महालक्ष्मी माध्यमिक विद्यालयमा आयोजित एक कार्यक्रमका बीच जिल्ला समन्वय समितिका प्रमुख मोहन बहादुर थापा मगरले स्वास्थ्यकर्मीलाई खोपको बाकस हस्तान्तरण गरी अभियानको सुरुवात गरेका हुन् । उनले यो अभियानले गर्भाशयको क्यान्सरबाट बचाउन महत्वपूर्ण भूमिका खेल्ने बताए ।

खोप अभियानका तहत १० देखि १४ वर्षका युवतीहरूलाई निःशुल्क खोप लगाइने जनाइएको छ । आज देखि सुरूवात भएको खोप अभियानमा जिल्लाभरका कक्षा ६ देखि १० सम्म पढ्ने र विद्यालय बाहिर रहेका १० देखि १४ वर्ष उमेर समूहका किशोरीलाई एचपिभी खोप लगाइने स्वास्थ्य कार्यालय गोरखाका खोप फोकल पर्सन नानीबाबु दानीले जानकारी दिए ।

त्यस्तै, जिल्लाका ११ स्थानीय तह भित्रका १० हजार २६८ किशोरीलाई पाठेघरको मुखको क्यान्सरविरुद्ध एचपिभी खोप लगाइने उनले बताए ।

विद्यालयमा रहेका बालिकाहरुलाई विद्यालय हाता भित्र र बाहिर रहेका बालिकाहरुलाई अभियानको अन्तिम दिन स्वास्थ्य केन्द्रमा खोप लगाउने गरी तयारी दानीले बताए । उनको अनुसार यसको लागि १९४ खोप केन्द्रमा २०५ स्वास्थ्यकर्मी र ४१० स्वयंसेवक परिचालन गरिनेछ ।

जिल्लामा सबैभन्दा धेरै गोरखा नगरपालिकाको २ हजार ५७३ किशोरीलाई खोप लगाइने भएको छ । अजिरकोट गाउँपालिकाका ५३६, आरुघाट गाउँपालिकाको १ हजार २ जना, गण्डकी गाउँपालिका ७६५, चुमनुब्री गाउँपालिकाका १५५, धार्चे गाउँपालिकाका ६७७ जनालाई लगाइने उनले बताए ।

त्यसैगरी पालुङटार नगरपालिकाका १ हजार ५५७, भिमसेन थापा गाउँपालिकाका ७१२, बारपाक सुलिकोटका ९७९, शहिद लखन गाउँपालिकाका ५७७ र सिरानचोक गाउँपालिकाका ७१९ जनालाई खोप लगाइने कार्यालयले जनाएको छ ।

सबै खोप केन्द्रबाट फागुन ६ गतेसम्म खोप लगाइने छ । अभियानलाई सफल बनाउन सबै अभिभावकहरूलाई आफ्ना छोरीहरूलाई खोप लगाउन प्रोत्साहित गर्न स्वास्थ्य विभागले आग्रह गरेको छ ।