चारदेशीय महिला टी–२० क्रिकेट शृंखला : नेपालले पहिलो खेलमा आज नामिबियासँग खेल्दै

पोखरा ।

युगान्डामा हुने चारदेशीय महिला टी–२० अन्तर्राष्ट्रिय क्रिकेट शृंखला अन्तर्गत नेपालले आफ्नो पहिलो खेलमा आज नामिबियासँग खेल्दैछ ।

नेपाल र नामिबियाको खेल युगान्डाको एन्टेब्बे क्रिकेट मैदानमा नेपाली समयअनुसार बेलुका पौने ५ बजे शुरू हुनेछ ।

नेपालले नामिबियाको महिला टोलीसँग पहिलो पटक खेल्न लागेको हो । शृंखलामा नेपालसहित घरेलु टोली युगान्डा, नामिबिया र हङकङ छन् ।

शृंखलामा सबै टोलीले एकअर्कासँग समान २\२ खेल खेल्नेछन् । जसमा नेपालले भोलि युगान्डासँग खेल्नेछ भने पर्सि हङकङसँग खेल्ने छ ।

त्यसैगरी नेपालले फागुन २८ गते नामिबियासँग, २९ गते युगान्डासँग र ३० गते हङकङसँग खेल्ने तालिका छ ।

लिग चरणको शीर्ष दुई टोलीले फाइनल खेल्नेछन् । फाइनल खेल चैत ३ गते हुनेछ ।