फरार प्रतिवादी ९ वर्षपछि पक्राउ, कैद भुक्तानका लागि कारागार चलान

गोरखा, चैत २८ ।

गोरखा जिल्ला अदालतको फरार सूचीमा रहेका एक जना प्रतिवादीलाई ९ वर्षपछि पक्राउ गरिएको छ।

सवारी ज्यान मुद्दामा अदालतले १ वर्ष १० महिना २२ दिन कैद तोकी फरार रहेका गोरखा जिल्ला, पालुङटार नगरपालिका–१ निवासी ३६ वर्षीय कुमार बाबु नेपालीलाई विशेष प्रहरी टोलीले पक्राउ गरेको हो।

फैसला कार्यान्वयनका लागि गठन गरिएको विशेष टोलीमार्फत २०८१ साल चैत २७ गते उनलाई नियन्त्रणमा लिइएको थियो।

पक्राउपछि अदालतमा पेश गरिएको र अदालतको आदेशअनुसार कैद भुक्तानको लागि उनलाई कारागार कार्यालय गोरखा पठाइएको जिल्ला प्रहरी कार्यालय गोरखाले जनाएको छ।

गोरखा जिल्ला अदालतको फैसला कार्यान्वयन अभियान अन्तर्गत फरार प्रतिवादीहरूलाई नियन्त्रणमा लिन प्रहरीले सक्रियता बढाएको छ।