गोरखामा पौडी खेल्ने क्रममा डुबी एक बालकको मृत्यु

गोरखा ।

गोरखा जिल्लाको गण्डकी गाउँपालिका–८, बसेरीका १२ वर्षीय निकेश नेपालीको पौडी खेल्ने क्रममा डुबेर मृत्यु भएको छ।

केदार नेपालीका छोरा निकेश नेपाली चैत २३ गते साँझ करिब ६ बजे बुढी गण्डकी नदीमा पौडी खेल्ने क्रममा बेपत्ता भएका थिए। घटनापछि सुरक्षाकर्मी तथा स्थानीयको सहयोगमा खोजी कार्य सुरु गरिएको थियो।

लगातारको खोजीपछि चैत ३० गते साँझ करिब ५ बजे गण्डकी गाउँपालिका–७, तीन भंगालस्थित त्रिशुली नदीको किनारमा निकेशको शव फेला परेको हो।

जिल्ला प्रहरी कार्यालय गोरखाका प्रहरी निरीक्षक ध्रुव प्रसाद शर्माका अनुसार घटनास्थलमा प्रहरी चौकी घ्याल्चोक र जिल्ला प्रहरी कार्यालय गोरखाबाट खटिएको अनुसन्धान टोलीले प्रारम्भिक अनुसन्धान तथा कानुनी प्रक्रिया पूरा गरी शवलाई पोष्टमार्टमको लागि प्राथमिक स्वास्थ्य केन्द्र गजुरी, धादिङ पठाइएको छ।

हाल घटनाबारे थप अनुसन्धान भइरहेको जिल्ला प्रहरी कार्यालय गोरखाले जनाएको छ।