पोखरा ।
काठमाडौंमा जारी नेपाल सुपर लिग (एनएसएल) फुटबलअन्तर्गत आज पोखरा थण्डर्स र बुटवल लुम्बिनीबीच प्रतिस्पर्धा हुँदैछ ।
यी दुई टिमबीचको खेल त्रिपुरेश्वरस्थित दशरथ रंगशालमा साँझ ६ बजेबाट सुरु हुनेछ । लिग चरणमा दुवै टिमको यो अन्तिम खेल हो ।
पोखरालाई प्लेअफ पुग्न आजको खेल जित्नै पर्ने स्थितीमा छ भने बुटवल लुम्बिनी यसअघि नै प्लेअफको समिरकणबाट बाहिरिसकेको छ ।
५ खेलबाट ५ अंकसहित पोखरा पाँचौ संथानमा छ भने १ अंकसहित बुटवल पूछारमा छ । पोखरा लिगको अन्तिम खेल जित्दै प्लेअफ पुग्ने लक्ष्यसहित आज मैदानमा हुनेछ ।
उता प्लेअफ होडबाट बाहिरिसकेको बुटवल लुम्बिनी भने अन्तिम खेलमा सुखद नतिजाका साथ लिग सकाउन चाहन्छ । बुटवलले अहिलेसम्म एक खेल पनि जितेको छैन ।
यदी आज पोखराले बुटवललाई पराजित गरेमा उसको ८ अंक हुनेछ । लिगको ६ खेल नै खेलिसकेको काठमाडौं रेजर्सको पनि ८ अंक छ ।
काठमाडौं र पोखराको अहिले माइनस १ गोल अन्तर छ । पोखरा विजयी हुँदा गोल अन्तर पनि सुधारिनेछ भने पोखरा अघि रहनेछ । योसंगै पोखराले हेड टु हेडमा काठमाडौंलाई पछि पार्नेछ र पोखरा पनि प्लेअफमा पुग्नेछ ।
यस्तै पोखरा विजयी भएमा झापा एफसी पनि आफ्नो अन्तिम लिग खेल्नुअघि नै बाहिरिनेछ ।
तर बराबरी वा हार भएमा पोखराको प्लेअफ सम्भावना सकिनेछ भने काठमाडौं रेजर्स प्लेअफ पुग्नेछ र झापा एफसीको पनि झिनो सम्भावना बाँकी रहनेछ ।
