पोखरा ।
एएफसी यू–२० वुमन्स एसियन कप छनोटको ड्र सार्वजनिक भएको छ ।
मलेसियाको क्वालम्पुरस्थित एएफसी हाउसमा सोमबार भएको ड्र अनुसार नेपाल साविक विजेता उत्तर कोरियासँगै समूह ए मा परेको छ ।
यस समूहमा नेपाल र उत्तर कोरियासँगै भुटान, मंगोलिया र साउदी अरेबिया छन् । नेपाल रहेको समूह ए का खेलहरु भुटानमा हुनेछ ।
अघिल्लो पटक सन् २०२४ मा भएको यू–२० वुमन्स एसियन कपको पहिलो चरणको छनोट पार गर्दै नेपाल दोस्रो चरणमा सम्म पुगेको थियो ।
सन् २०२३ मा भएको पहिलो चरणमा नेपालले प्यालेस्टाइन र नर्दन मारियाना आइल्याण्डलाई पछि पार्दै दोस्रो चरणमा पुगेको थियो । तर दोस्रो चरणमा भने नेपाल जितविहिन हुँदै बाहिरियो । यस पटक सिधै एक चरणको छनोट मात्र हुनेछ । एसियाका ३३ राष्ट्रलाई विभिन्न ८ समूहमा बाँडिएको छ ।
नेपाल रहेको समूह ए मा पाँच टिम रहँदा अन्य ७ समूहमा चार–चार टिम छन् ।
क्वालिफायरको खेलहरु आगामी अगष्ट २ देखि १० सम्म हुनेछ । छनोटमा २३ राष्ट्र सहभागी हुनेछन् । छनोट चरणबाट ११ राष्ट्र अर्को वर्ष अप्रलिमा थाइल्याण्डमा हुने एएफसी यू–२० वुमन्स एसियन कपमा छनोट हुनेछन् ।
थाइल्याण्ड भने आयोजकको हैसियतमा स्वत छनोट भइसकेको छ ।
८ समूहको समूह विजेता सिधै छनोट हुनेछन् भने उपविजेता मध्येबाट ३ उत्कृष्ट टिमले पनि यू–२० वुमन्स एसियन कपमा स्थान बनाउनेछन् ।
छनोट चरणका खेलहरू भुटान, चीन, लाओस, मलेसिया, म्यानमार, ताजिकिस्तान, उज्बेकिस्तान र भियतनाममा हुनेछन् ।
