खेल नेपाली समयअनुसार मंगलबार विहान ४ : ४५ बजेदेखि शुरू
पाेखरा । ब्राजिलमा जारी कोपा अमेरिका फुटबल अन्तर्गत मंगलबार बिहान पहिलो सेमिफाइनल खेल हुँदैछ । जसमा घरेलु टोली ब्राजिलले पेरुसँग प्रतिस्पर्धा गर्नेछ । निल्टन सान्तोस रंगशालामा हुने खेल नेपाली समय अनुसार बिहान ४:४५ बजे शुरु हुनेछ । ब्राजिलले क्वाटरफाइनलमा चिलीलाई १–० ले पराजित गरेको थियो ।
पेरुले भने पाराग्वेलाई पेनाल्टी सुटआउटमा ४–२ ले पराजित गर्दै सेमिफाइनलमा स्थान बनाएको हो । पछिल्लो पटक २०१९ मा भएको कोपा अमेरिकामा ब्राजिल र पेरु नै फाइनलमा भिडेका थिए । घरेलु मैदानमै भएको उक्त प्रतियोगितामा ब्राजिलले पेरुलाई हराउँदै उपाधि जितेको थियो । दुई वर्षपछि ब्राजिलले सेमिफाइनलमा त्यही पेरुसँग खेल्दैछ ।
यस संस्करणमा पनि यी दुई टोली एउटै समूहमा परेका थिए । समूह बी मा ब्राजिलले पेरुलाई ४–० ले पराजित गरेको थियो ।
यसपटक पनि ब्राजिल उपाधि दाबेदार टोलीको रुपमा छ भने पेरु अन्डरडगको रुपमा छ । सन् २०११ र २०१५ मा क्वाटरफाइनलबाटे बाहिरिएको ब्राजिलले २०१६ मा समूह चरण समेत पार गर्न सकेको थियो । २०१९ को च्याम्पियन ब्राजिल यसपटक पनि घरेलु मैदानमा हुँदा उपाधिको दाबेदारको रुपमा छ ।
ब्राजिलले ९ पटक कोपा अमेरिकाको उपाधि जितेको छ । जसमा ५ पटक आयोजकको रुपमा जितेको छ । अर्को तथ्य ब्राजिलले आयोजक हुँदा सधैं उपाधि जितेको छ ।
ब्राजिलले पछिल्लो पटक सन् १९९७ र १९९९ तथा २००४ र २००६ मा लगातार दुई पटक उपाधि जितेको थियो ।
दुई पटकको च्याम्पियन पेरुले भने सन् १९७५ यता उपाधि जित्न सकेको छैन । २०१९ को फाइनलमा हारेको पेरु २०११ र २०१५ मा तेस्रो भएको थियो ।
ब्राजिल र पेरुबीच अहिलेसम्म कुल ४९ खेल हुँदा ब्राजिलले ३५ खेल जितेको छ । पेरुले ५ खेल मात्र जित्दा ९ खेल बराबरीमा सकिएको थियो ।
प्रकाशित मिति २०७८ असार २१ गते सोमबार ०७:०५
