नेपालले पहिलो खेल जुन २९ मा लाओससँग खेल्ने
पोखरा ।
एएफसी महिला एसिया कप छनोट खेल्ने नेपाली महिला राष्ट्रिय फुटबल टिमको बिदाइ गरिएको छ ।
अखिल नेपाल फुटबल संघ (एन्फा) ले सोमबार एक कार्यक्रम आयोजना गर्दै महिला टोलीलाई बिदाई गरेको हो । टोलीलाई युवा तथा खेलकुद मन्त्रालयका सचिव डा. हरि प्रसाद लम्साल, एन्फा अध्यक्ष पंकज विक्रम नेम्वाङलगायतले बिदाइ गरेका हुन् ।
बिदाइ कार्यक्रममा बोल्दै एन्फा अध्यक्ष नेम्वाङले टिम निकै परिष्कृत रहेको बताउँदै जितका लागि शुभकामना दिए ।
त्यस्तै कप्तान तथा गोलकिपर एन्जिला तुम्बापो सुब्बाले नेपालको लक्ष्य छनोट हुने रहेको बताइन् । कप्तान तुम्बापोले नयाँ प्रशिक्षकको आगामनपछि धेरै पक्षमा सुधार आएको आशा व्यक्त गरेकी छन् ।
साबित्रा भण्डारीमाथि सबैको भरोसा रहेको र उनी स्टार खेलाडी रहेको उल्लेख गर्दै कप्तान अञ्जिलाले जित निकाल्न एक टिम भएर खेल्दा मात्र सम्भव हुने बताएकी छन् ।
टोलीकी फरर्वाड सावित्रा भण्डारीले यो छनोटका लागि आफूहरू सकारात्मक रहेको र यो विश्वकपजस्तै रहेको पनि बताइन् ।
यो छनोटलाई लिएर सबै उत्साहित रहे पनि रहेको उनको भनाइ छ । महिला खेलाडीका लागि आवश्यक पर्ने प्रोत्साहन प्रशिक्षकबाट पाइरहेको र अहिले टोलीमा रहेका हरेक खेलाडी महत्वपूर्ण रहने गरी तयारी भइरहेको उनी बताउँछिन् ।
यही जुन २९ देखि जुलाई ५ सम्म उज्बेकिस्तानमा एएफसी महिला एशियन क्वालिफायर्स हुँदैछ । नेपाली महिला टोलीका लागि अब हुने छनोटको पहिलो खेल १००औं अन्तर्राष्ट्रिय खेल हुनेछ ।
१०० खेल खेल्न पाउनु खेलाडीको लागि पनि ठुलो कुरा भएको साबित्रा भण्डारी साम्बाले बताइन् । छनोटमा समूह एफमा रहेको नेपालले लाओस, उज्वेकिस्तान र श्रीलंकासँग खेल्नेछ ।
पछिल्लो पटक सन् १९९९ मा महिला एसिया कप खेलेको नेपाली महिला टोली २६ वर्षपछि एसिया कपमा छनोट हुने लक्ष्यमा छ ।
नेपालले जुन २९ मा लाओससँग पहिलो खेल खेल्नेछ भने जुलाई २ मा श्रीलंकासँग दोस्रो खेल खेल्नेछ ।
यस्तै जुलाई ५ मा आयोजक उज्वेकिस्तानसँग प्रतिस्पर्धा गर्नेछ । छनोटको शीर्ष स्थानमा रहने टोली अर्को वर्ष अष्ट्रेलियामा हुने महिला एसिया कपमा छनोट हुनेछ ।
नेपाली महिला टोलीले अहिलेसम्म तीन पटक एसियन कप फुटबल खेलेको छ । पछिल्लो पटक सन् २०२२ को महिला एसियन कपको छनोट खेलेपनि नेपाली महिला टोली छनोट हुन सकेन ।
एएफसी महिला एसिया कप छनोट खेल्ने नेपाली टोलीमा तीन गोलकिपरमा अञ्जिला तुम्बापो सुब्बा, अञ्जना रानामगर र उषा नाथ तथा डिफेन्डरमा गीता राना, निशा ठोकर, समीक्षा घिमिरे, मनमाया दमाई, प्रतीक्षा चौधरी, विमला विक, पूजा राना र अमृता जैशी छन् ।
टोलीको मिडफिल्डरमा विमला चौधरी, अनिता बस्नेत, रेनुका नगरकोटी, प्रीति राई, सरु लिम्बु, सबिता राना मगर, सरस्वती हमाल तथा फरवार्डमा साबित्रा भण्डारी, रश्मिकुमारी घिसिङ, चन्द्रा भण्डारी, अनिता केसी र रेखा पौडेल छन् ।
प्रकाशित मिति २०८२ असार १० गते मंगलबार ०९:३३
