लमजुङ ।
लमजुङको मस्र्याङ्दी गाउँपालिकाले आगामी आर्थिक वर्ष २०८२÷०८३ का लागि ५९ करोड ३४ लाख ९२ हजार पाँच सय रुपैयाँको बजेट सार्वजनिक गरेको छ ।
चालु आर्थिक वर्षको ५० करोड ९४ लाख ९४ हजार रुपैयाँभन्दा करिब ९ करोड रुपैयाँ बढी बजेट विनियोजन गरिएको हो ।
मंगलबार गाउँपालिकाको १७ औँ गाउँसभामा उपाध्यक्ष जुनामाया थापाले नीति, कार्यक्रम तथा बजेट प्रस्तुत गरेकी हुन् ।
प्रस्तुत बजेटमा संघीय सरकारको वित्तीय समानीकरण अनुदानबाट १० करोड ३० लाख, प्रदेश सरकारबाट १ करोड १३ लाख १५ हजार, संघीय सरकारको राजस्व बाँडफाँडबाट ११ करोड ६ हजार ८४८ र प्रदेश सरकारको राजस्व
बाँडफाँडबाट १ करोड २० लाख ४९ हजार रुपैयाँ प्राप्त हुने उल्लेख गरिएको छ ।
यसैगरी आन्तरिक स्रोतबाट १ करोड, संघीय सशर्त अनुदानबाट २४ करोड ४८ लाख, समपूरक अनुदान अन्तर्गत संघ सरकारबाट २ करोड ९७ लाख र प्रदेश सरकारबाट ६० लाख रुपैयाँ प्राप्त हुने अनुमान गरिएको छ ।
जलविद्युत रोयल्टीबाट ३ करोड ६० लाख, पर्वतारोहण रोयल्टीबाट ८ लाख, वन पैदावर रोयल्टीबाट ४ लाख र क्षमता विकास कार्यक्रम अन्तर्गत ४ लाख ३६ हजार ५ सय गरी कुल आय ५९ करोड ३४ लाख ९२ हजार ५ सय रुपैयाँको बजेट प्रस्तुत गरिएको हो ।
गाउँपालिकाले चालु खर्चतर्फ ७ करोड ७७ लाख, पुँजीगत खर्चतर्फ १९ करोड ७९ लाख, सशर्ततर्फ २४ करोड ४८ लाख, समपूरक कोषतर्फ ५ करोड ९५ लाख, संघीय विशेष अनुदान अन्तर्गत ९० लाख र प्रदेश विशेष अनुदानतर्फ ३९ लाख ५६ हजार रुपैयाँ विनियोजन गरिएको जनाएको छ ।
वडागत रुपमा गाउँ–बस्तीका योजनालाई समेट्ने गरी ९ वटै वडाका लागि ४ करोड ६० लाख रुपैयाँ विनियोजन गरिएको छ । त्यस्तै, कृषि, पशुपन्छी तथा जडीबुटी क्षेत्रका लागि छुट्टै कार्यक्रम तय गरिएको छ ।
कृषि विकास कार्यक्रम अन्तर्गत १ करोड २५ लाख, पशुपन्छी विकासका लागि ७८ लाख र जडीबुटी विकास तथा प्रशोधनका लागि १० लाख रुपैयाँ विनियोजन गरिएको छ ।
गाउँपालिका अध्यक्ष अर्जुन गुरुङका अनुसार विपन्न परिवारलाई लक्षित गर्दै स्वास्थ्य बीमा, ग वर्गका अपांगता भएकाका लागि जीवन निर्वाह भत्ता, एकल जेष्ठ नागरिकलाई भत्ता उपलब्ध गराउने कार्यक्रम समावेश गरिएको छ ।
प्रकाशित मिति २०८२ असार ११ गते बुधबार ०८:५८
