नवलपुर ।
कावासोतीमा बहिरा समुदायका लागि विपद् जोखिम न्यूनीकरण तथा व्यवस्थापन सम्बन्धी एक दिने तालिम सम्पन्न भएको छ ।
नवलपरासी बहिरा संघको आयोजना र कावासोती नगरपालिकाको सहकार्यमा शनिबार भएको तालिममा जिल्लाभरिबाट ४५ जना बहिरा सहभागी थिए ।
कार्यक्रममा बोल्दै कावासोती नगरपालिकाकी उपप्रमुख तथा प्रमुख अतिथि फूल कुमारी थनेतले नवलपुर जिल्लामा ५ कक्षाभन्दा माथिको बहिरा शिक्षाको व्यवस्था नभएकोले बाध्यतावश अन्य जिल्लामा जानुपर्ने अवस्था रहेको बताइन् ।
बहिरा विद्यार्थीहरूको शिक्षामा पहुँच वृद्धि गर्न सबै स्थानीय तहको साझा पहल आवश्यक रहेको उनको भनाइ थियो ।
तालिममा प्रशिक्षकको भूमिकामा कावासोती नगरपालिकाका आर्किटेक्ट इञ्जिनियर पबन रुपाखेती र प्रमुख प्रशासकीय अधिकृत लिलाराज पौडेलले निर्वाह गरेका थिए ।
प्रशिक्षकद्वयले विपद् के हो, कस्ता खालका विपद् आउन सक्छन्, ती विपद्बाट कसरी जोगिने, पूर्वतयारी कसरी गर्ने भन्ने विषयमा सहभागीलाई व्यावहारिक प्रशिक्षण दिएका थिए ।
कार्यक्रममा संस्थापक अध्यक्ष दीपावली शर्माले फरक क्षमता भएका व्यक्तिहरूलाई विपद् पूर्वतयारी र जोखिम न्यूनीकरण सम्बन्धी ज्ञान अत्यन्तै आवश्यक रहेको बताइन् ।
उनले बहिराहरूले समाजमा शिक्षा, अवसर र पहुँचमा ठूलै संघर्ष गर्नुपरेको उल्लेख गर्दै, विपद्को बेला त झनै उनीहरू जोखिममा पर्ने बताउँदै यो तालिमको आयोजना गरिएको बताइन् ।
उनका अनुसार नवलपुर जिल्लामा बहिरा विद्यार्थीका लागि माध्यमिक शिक्षा प्राप्त गर्ने व्यवस्था अझैसम्म छैन । हाल जिल्लामा जम्मा ३ विद्यालयमा ५ कक्षासम्म मात्र अध्यापन हुन्छ ।
यसै कारण यस जिल्लाका बहिरा विद्यार्थी चितवन, गोरखा, पोखरा लगायतका जिल्लामा गएर अध्ययन गर्नुपर्ने बाध्यता रहेको छ ।
त्यस्तै कार्यक्रमकी अध्यक्ष तथा नवलपरासी बहिरा संघकी अध्यक्ष प्रतिमा गुरुङले जिल्लामा दोभाषेको अभावले बहिरा व्यक्तिहरू थप समस्यामा परेको भन्दै नगरपालिकाले दोभाषे उत्पादनमा सहकार्य गर्नुपर्नेमा जोड दिइन् ।
कार्यक्रममा चितवनबाट दोभाषेको भूमिकामा सिता पौडेल सहभागी थिइन् । उनले साइन भाषाको माध्यमबाट सहभागी र प्रशिक्षकबीच पुलको काम गरिन् ।
विपद् जोखिम न्यूनीकरण तालिमले बहिरा समुदायलाई सुरक्षित बनाउने, उनीहरुको अधिकार सुनिश्चित गर्न सहयोग पु¥याउने तथा समाजमा उनीहरूको सहभागिता अभिवृद्धि गराउने इञ्जिनियर तथा प्रशिक्षक पबन रुपाखेतीले बताए ।
यस्ता कार्यक्रमले बहिरा व्यक्तिहरूले भोगिरहेका सामाजिक चुनौतीहरूमा सरकार र समुदायको ध्यानाकर्षण गराउन पनि सहयोग पु¥याउने अपेक्षा उनले व्यक्त गरे ।
तालिममा बहिरा सहभागीहरूले विपद् सम्बन्धी विषयमा पहिलो पटक यति विस्तृत रूपमा बुझ्न पाएको भन्दै खुसी व्यक्त गरे ।
कार्यक्रममा २०८१ को एसईईमा उत्तीर्ण भएका नवलपुरका दुई बहिरा विद्यार्थीलाई सम्मान गरिएको थियो ।
एसईई उत्तीर्ण बहिरा विद्यार्थीमध्ये मध्यबिन्दु चोरमाराकी कविता कुमाल र कावासोती–३ का क्षितिज विकलाई सम्मान गरिएको हो ।
नवलपुरमा बहिराहरूका लागि माध्यमिक तहको विद्यालय नहुँदा उनीहरू गोरखा स्थित मनकामना बहिरा आवासीय माध्यमिक विद्यालयमा अध्ययनरत छन् ।
प्रकाशित मिति २०८२ असार १५ गते आइतबार ०९:३४
