पोखरा
नेपाली खेलकुद क्षेत्रकै सबैभन्दा प्रतिष्ठित एनएसजेएफ पल्सर स्पोर्ट्स अवार्ड २०८१ आगामी भदौ २९ गते पोखरामा हुने भएको छ ।
नेपाल खेलकुद पत्रकार मञ्च (एनएसजेएफ) ले शुक्रवार अवार्ड घोषणा कार्यक्रमा पहिलोपल्ट एनएसजेएफ पल्सर स्पोर्ट्स अवार्ड काठमाडौंबाहिर लैजान लागेको जनाएको हो । २०६० सालदेखि निरन्तर आयोजना हुँदै आएको यो अवार्ड २२ औं संस्करण हो ।
अहिलेसम्म उपत्यकाभित्र मात्र अवार्ड आयोजना हुँदै आएको थियो । तर स्पोर्ट्स अवार्डलाई देशव्यापी पु¥याउने उद्देश्यले पोखरामा आयोजना गर्न लागिएको मञ्चका महासचिव अञ्जन खड्काले जानकारी दिए । पोखरा भ्रमण वर्षको अवसरमा २२औं संस्करण हुने भएको छ । शुक्रबार नै पत्रकार सम्मेलनमा खेलकुद पत्रकार मञ्च र अवार्डको मुख्य प्रायोजक गोल्छा गु्रपको पल्सर मोटरसाइकलसँग पाँच वर्षको सम्झौता नवीकरण भएको छ । यसका मञ्चका अध्यक्ष निरञ्जन अधिकारी र गोल्छा ग्रुपका प्रवन्धक निर्देशक अभिमन्यु गोल्छाबीच सम्झौतापत्रमा हस्ताक्षर भएको थियो ।
४० लाखभन्दा माथिको सम्झौता भएको उक्त पत्रकार सम्मेलनमा जानकारी दिइएको थियो । नगद प्रायोजनमा गत वर्षको भन्दा ३३ प्रतिशत वृद्धि गरिएको गोल्छा ग्रुपका प्रवन्धक निर्देशक अभिमन्यु गोल्छाले जानकारी दिए ।
गोल्छा ग्रुपका प्रवन्धक निर्देशक अभिमन्युले मञ्च र गोल्छा ग्रुपबीचको यो सहकार्य नेपालमा लामो रहेको उल्लेख गर्दै एकआपसमा विश्वास, भरोसा र खेलकुदको माध्यमबाट देशलाई एकतामा बाध्ने उद्देश्यअनुरूप सम्झौताको १७ औं वर्षमा पुगेको बताए । देशका खेलाडीलाई सम्मान गर्ने अभियानमा निरन्तर सहकार्य गर्न पाउँदा गोल्छा ग्रुप धेरै खुसी र उत्साहित रहेको उनी बताउँछन् ।
प्रकाशित मिति २०८२ साउन १० गते शुक्रबार ०८:०४
