पोखरा ।
नेपाल रग्बी संघले एसिया रग्बी इमिरेट्स यु–२० सेभेन्स ट्रफीका लागि नेपाली यू–२० महिला रग्बी टोली घोषणा गरेको छ ।
एसिया रग्बी इमिरेट्स यु–२० सेभेन्स ट्रफी २०२५ यही साउन २४ देखि २७ गतेसम्म भारतमा हुने आयोजना हुँदै छ ।
यसै ट्रफीका लागि रग्बी संघले आइतबार १३ सदस्यीय नेपाली युवा टोली घोषणा गरेको हो ।
नेपाली टोलीमा सम्झौता तुम्बापो, लक्की मगर, सनमिका मगर, रेखा खड्का, सुशीला सुनुवार, निशा घलान, रोश्ना पोखरेल, पूजा डंगोल, कविता बादी, आरुषी भट्टराई, सलिना माझी, समीक्षा गौतम र रमिरा शाही छिन् ।
सावित्री पुर्जाको प्रशिक्षणमा नेपाली यु–२० महिला रग्बी टोली छनोट भएको हो ।
नेपाली टोली प्रतियोगितामा सहभागी हुन आगामी साउन २२ गते भारत प्रस्थान गर्ने छ ।
प्रतियोगितामा एसियाका विभिन्न ११ राष्ट्रबाट समान ८–८ पुरुष र महिला युथ टोलीले प्रतिस्पर्धा गर्दैछन् ।
खेल बिहारस्थित राजगीर रंगशालामा खेलाइने रग्बी संघले जनाएको छ ।
पछिल्लो संस्करणको यस उमेर समूहको प्रतियोगिता नेपालमा नै आयोजना भएको थियो । यसपल्टमा भने भारतले आयोजना हुने भएको हो ।
नेपाली टोलीले हाल सर्लाहीको राधाकृष्ण खेल मैदानमा प्रशिक्षण गरिरहेको नेपाल रग्बी संघका महासचिव गोविन्द घिमिरेले जानकारी दिए ।
प्रतियोगिता हुने भारतको मौसमसँग मिल्नेगरी टोलीलाई पछिल्लो एक महिनादेखि सर्लाहीमा प्रशिक्षणमा राखिएको महासचिव घिमिरेले बताए ।
प्रकाशित मिति २०८२ साउन २० गते सोमबार १०:३२
